Генрык Скірмунт нарадзіўся ў в. Моладава Кобрынскага павета Гродзенскай губерні (цяпер аграгарадок у Іванаўскім раёне Брэсцкай вобласці). Адукацыю атрымаў у нямецкай гімназіі ў Лібаве Курляндскай губерні (цяпер г. Ліепая, Латвія). Каля 1884 г. паступіў у Санкт-Пецярбургскую кансерваторыю, вучыўся ў А. Рубінштэйна і М. Салаўёва. Праз некалькі гадоў для далейшай музычнай адукацыі выехаў у Парыж, потым вучыўся ў Варшаве і Берліне. Стаў аўтарам оперы “Пан Валадыёўскі” (паводле рамана Г. Сенкевіча), прэм’ера якой адбылася ў 1902 г. у Львове.

У 1898 г. у Варшаве Г. Скірмунт выдаў на польскай мове свой першы зборнік “З вершаў і песень Генрыка Скірмунта”. У перыяд 1904–1913 гг. у перыядычных выданнях таго часу (“Gazeta narodowa”, “Kurier Litewski”, “Pochodnia” і інш.) друкаваліся яго асобныя вершы і песні. У 1903 і 1912 гг. падрыхтаваў да выдання двухтомны зборнік “Паэзія”.

Падчас Першай сусветнай вайны Генрык Скірмунт працаваў у Германіі і Польшчы. У 1920 г. вярнуўся ў родны маёнтак, які аказаўся значна пашкоджаным. Займаўся грамадскімі справамі павета, аднаўляў сваю сядзібу і гаспадарку. У 1939 г. Г. Скірмунт разам са сваёй сястрой быў арыштаваны савецкамі ўладамі і растраляны.

Матэрыял падрыхтаваны ў 2018 г.