Асноўнымі тэмамі ў творчасці рускамоўнага паэта Беларусі, члена Саюза беларускіх пісьменнікаў і Саюза пісьменнікаў Расіі Валерыя Фёдаравіча Грышкаўца, з’яўляюцца развагі над лёсам роднага краю, сацыяльнымі і маральна-этычнымі праблемамі нашай рэчаіснасці. Вялікая праца вядзецца ім як перакладчыкам і па папулярызацыі беларускай літаратуры за межамі краіны.

Нарадзіўся будучы паэт 23 снежня 1953 г. у г. Пінску. Пасля заканчэння школы працаваў слесарам, электрыкам, матросам на рачным флоце, журналістам. У паэзію прыйшоў у 1968 г., калі надрукаваў свае першыя вершы ў газеце “Полесская правда”. У 1981 г. выдаў першы зборнік паэзіі “Время откровений”. Друкаваўся таксама ў “Литературной газете”, “Литературной России”, альманаху “Истоки”, у зборніках “Дзень паэзіі”, часопісах “Нёман”, “Родник”. У 1991 г. выйшаў другі зборнік вершаў паэта “Круг аистиный”.

Пасля гэтага некалькі гадоў Валерый Фёдаравіч жыў і працаваў у Маскве. У 1997 г. скончыў Вышэйшыя літаратурныя курсы Літаратурнага інстытута імя М. Горкага. У 2005 г. вярнуўся на радзіму ў Пінск, працаваў уласным карэспандэнтам брэсцкай абласной газеты “Заря”.

Адначасова з напісаннем сваіх вершаў В. Ф. Грышкавец актыўна займаецца перакладамі твораў калег па пяру з польскай і беларускай мовы на рускую. Мастацкі пераклад, тым больш вершаваны, – вельмі няпростая справа. Аднак, высокамастацкія пераклады Валерыя Фёдаравіча не саступаюць арыгіналам. У 2004 г. за свае шматлікія пераклады вершаў брэсцкіх паэтаў і выданне ў Маскве анталогіі беларускай паэзіі пад назвай “Из века в век”, дзе былі змешчаны творы амаль усіх паэтаў Брэстчыны, майстар стаў трэцім у гісторыі ўручэння лаўрэатам «Берасьцейскай мядовай прэміі ў літаратуры “Пуд мёду”», якая была заснавана паэтам Міколам Папекай з в. Лінава Пружанскага раёна Брэсцкай вобласці.

У 2006 г. В. Ф. Грышкавец стаў пераможцам гарадскога конкурсу на лепшы тэкст гімна г. Пінска. За кнігу перакладаў “Белой вежи свет” у 2007 г. паэт быў намініраваны на літаратурную прэмію Брэсцкага абласнога выканаўчага камітэта імя У. А. Калесніка. Гэта цудоўная кніга паэзіі не мае аналагаў у Беларусі: паэт патраціў не адзін год на тое, каб лепшыя вершы брэсцкіх паэтаў-сучаснікаў, тых, хто некалі працаваў на Берасцейшчыне, і тых, хто пакінуў яе назаўсёды, загучалі на рускай мове. В. Ф. Грышкавец з’яўляецца таксама лаўрэатам Міжнароднага літаратурнага конкурсу імя А. Платонава.

Матэрыял падрыхтаваны ў 2011 г.