Леанід Міхайлавіч Лабанок нарадзіўся ў в. Слабодка Любанскага раёна Мінскай вобласці ў сям'і служачых. Пасля заканчэння сярэдняй школы паступіў на лячэбны факультэт Гродзенскага медыцынскага інстытута, дзе займаўся навукова-даследчай дзейнасцю. У 1966 г. быў прызваны ў армію. Пасля дэмабілізацыі паступіў у аспірантуру Інстытута фізіялогіі Акадэміі навук БССР. З 1969 да 1987 г. працаваў у Сектары геранталогіі АН БССР, з 1987 да 2003 г. узначальваў лабараторыю Інстытута радыебіялогіі НАН Беларусі, з 2004 г. – прафесар Беларускага дзяржаўнага медыцынскага ўніверсітэта. З 1995 г. Леанід Міхайлавіч Лабанок – прафесар Міжнароднага экалагічнага ўніверсітэта імя А.Д. Сахарава, з 1996 г. – член-карэспандэнт НАН Беларусі.

Асноўныя навуковыя працы Л.М. Лабанка прысвечаны фізіялогіі сардэчна-сасудзістай сістэмы, геранталогіі, радыебіялогіі. Вучоным абгрунтаваны комплексны падыход у даследаваннях пострадыяцыйных змен іерархічна супадпарадкаваных функцыянальных сістэм; выяўлены асаблівасці праяўлення біялагічных эфектаў у сэрцы, сасудах, кардыёміяцытах, гладкацяглічных клетках сасудаў, форменных элементах крыві, плазматычных мембранах у залежнасці ад дозы і магутнасці выпраменьвання; вызначаны асноўныя заканамернасці змен функцый сардэчна-сасудзістай сістэмы, цэнтральных і перыферыйных механізмаў іх нейрагарманальнага кантролю на розных этапах пострадыяцыйнага перыяду. Вынікі, атрыманыя пры даследаваннях радыемадыфіцыруючых уласцівасцей злучэнняў прыроднага паходжання, сталі асновай для стварэння харчовых дабавак і прадуктаў спецыяльнага прызначэння. Леанід Міхайлавіч Лабанок напісаў больш за 310 навуковых прац (у тым ліку тры манаграфіі), зрабіў шэраг вынаходніцтваў. У 1994 г. выйшла яго кніга «Гормоны и старение. Регуляция сократительной функции сердца». Пад кіраўніцтвам вучонага абаронена дзесяць кандыдацкіх дысертацый. Леанід Міхайлавіч Лабанок уваходзіць у шэраг навуковых аб'яднанняў фізіёлагаў, герантолагаў і радыебіёлагаў, з’яўляецца удзельнікам шматлікіх з'ездаў, канферэнцый.

За шматгадовую плённую навуковую працу Л.М. Лабанок узнагароджаны медалём «За працоўныя заслугі» (1999), ганаровымі граматамі і дыпломамі. У 2000 г. Міжнародным біяграфічным цэнтрам (г. Кембрыдж, Англія) быў уключаны ў спіс выдатных вучоных ХХ ст.

Матэрыял падрыхтаваны Любанскай цэнтральнай раённай бібліятэкай (Мінская вобласць) у 2013 г.