Уладзімір Мікалаевіч Рашэтнікаў нарадзіўся ў в. Халопенічы (Глускі раён Магілёўскай вобласці) у сям'і служачых. У 1954 г. выдатна скончыў сярэднюю школу і паступіў у Маскоўскую сельскагаспадарчую акадэмію імя К.А. Ціміразева. У 1959 г. быў накіраваны на працу ў Казахстан. Праз год вярнуўся ў Беларусь, дзе пачаў працаваць у Беларускім НДІ пладаводства, агародніцтва і бульбы на пасадзе малодшага навуковага супрацоўніка.

У снежні 1962 г. У.М. Рашэтнікаў паступіў у аспірантуру Інстытута біялогіі АН БССР, пасля заканчэння якой абараніў кандыдацкую дысертацыю. Працаваў малодшым навуковым супрацоўнікам лабараторыі біяхіміі раслін, з 1968 г. – старэйшы навуковы супрацоўнік. У 1977 г. абраны на пасаду вучонага сакратара Інстытута эксперыментальнай батанікі імя В.Ф. Купрэвіча АН БССР, з 1978 г. з’яўляўся намеснікам дырэктара па навуковай рабоце. У 1986 г. абараніў доктарскую дысертацыю ў Інстытуце фізіялогіі раслін і генетыкі АН УССР. Навуковая грамадскасць высока ацаніла ўклад У.М. Рашэтнікава ў развіццё навукі, падрыхтоўку кадраў, арганізацыю даследаванняў. У 1991 г. ён быў абраны членам-карэспандэнтам НАН Беларусі, праз год атрымаў вучонае званне прафесара, у 2000 г. стаў акадэмікам. З канца 1997 г. па 2009 г. У.М. Рашэтнікаў працаваў дырэктарам Цэнтральнага батанічнага саду НАН Беларусі.

Уладзімір Мікалаевіч Рашэтнікаў з'яўляецца аўтарам шматлікіх прац, у тым ліку 9 манаграфій «Пластиды и клеточные ядра высших растений» (1982), «Техника биохимического исследования субклеточных структур и биополимеров» (1977, 1986), «Фотосинтетический аппарат и селекция тритикале» (1991), «Клеточные ядра высших растений: состав, структура, функции» (1992), «Голубика высокорослая: оценка адаптационного потенциала при интродукции в условиях Беларуси» (2007), «Информационные структуры растительной клетки» (2008), «Формирование биохимического состава плодов видов семейства Ericaceae (Вересковые) при интродукции в условиях Беларуси» (2011) і інш. Пад кіраўніцтвам вучонага абаронена некалькі кандыдацкіх і дзве доктарскія дысертацыі.

Навуковую работу У.М. Рашэтнікаў сумяшчае з грамадскай дзейнасцю. Ён з'яўляецца навуковым кіраўніком Дзяржаўнай праграмы «Фітапрэпараты», членам Дзяржаўнага экспертнага савета па экалогіі і рацыянальным выкарыстанні прыродных рэсурсаў камітэта па навуцы і тэхналогіях пры Савеце Міністраў Рэспублікі Беларусь і іншых устаноў і арганізацый.

За вялікі ўклад у навуку У.М. Рашэтнікаў узнагароджаны медалямі і ганаровымі граматамі. У 2008 г. вучонаму прысвоена ганаровае званне «Заслужаны дзеяч навукі Рэспублікі Беларусь».

Матэрыял падрыхтаваны Магілёўскай абласной бібліятэкай імя У.І. Леніна ў 2013 г.