Валерый Міхайлавіч нарадзіўся 8 лютага 1937 г. у Віцебску. Вышэйшую адукацыю атрымаў у Віцебскім ветэрынарным інстытуце (1959). У кастрычніку 1960 г. малады чалавек быў прызначаны на пасаду асістэнта кафедры біялагічнай хіміі гэтага інстытута. Пад кіраўніцтвам прафесара Ф.Я. Беранштэйна ў 1965 г. малады вучоны абараніў дысертацыю “Уплыў малібдэну на некаторыя біяхімічныя працэсы ў арганізме жывёл” на атрыманне вучонай ступені кандыдата біялагічных навук.

У 1966 г. узначаліў кафедру неарганічнай і аналітычнай хіміі, якой кіраваў да 1998 г. У 1967 г. яму было прысвоена вучонае званне дацэнта. Супрацоўнікі кафедры пад кіраўніцтвам В.М. Холада вялі навукова-даследчую работу ў галіне біяхіміі мікраэлементаў і клінічнай біяхіміі. У 1974 г. Валерый Міхайлавіч абараніў доктарскую дысертацыю на тэму “Электрафарэтычнае і імунахімічнае вывучэнне бялкоў сывараткі крыві буйной рагатай жывёлы ў норме і пры паталогіі”. У 1977 г. яму было прысвоена званне прафесара.

Віцебскі ветэрынарны інстытут у 1994 г. быў рэарганізаваны ў Віцебскую дзяржаўную акадэмію ветэрынарнай медыцыны. З 1998 г. пасля аб’яднання кафедры неарганічнай і аналітычнай хіміі і кафедры арганічнай і біялагічнай хіміі Валерый Міхайлавіч загадваў кафедрай хіміі на працягу сямі гадоў. З 2006 г. В.М. Холад з’яўляецца прафесарам кафедры хіміі.

Вучоны надрукаваў каля 180 вучэбна-метадычных і навуковых прац па пытаннях хіміі бялкоў крыві, біяхіміі мікраэлементаў, біяхімічных метадаў дыягностыкі хвароб. Ён з’яўляецца аўтарам 4 кніг, атрымаў 2 аўтарскія пасведчанні на вынаходніцтвы. Пад яго кіраўніцтвам падрыхтавана і абаронена 9 кандыдацкіх дысертацый. Таленавіты навуковец і педагог працягвае працу ў навучальнай установе, з якой звязаў усё сваё жыццё.

Матэрыял падрыхтаваны Віцебскай абласной бібліятэкай імя У. І. Леніна ў 2011 г.