Выдатны беларускі навуковец, член-карэспандэнт Нацыянальнай акадэміі навук Беларусі, доктар геолага-мінералагічных навук, прафесар Аляксандр Кірылавіч Карабанаў нарадзіўся ў Мінску. Пасля заканчэння Беларускага дзяржаўнага ўніверсітэта ў 1974 г. прыйшоў у Інстытут геалагічных навук НАН Беларусі, дзе з 1992 г. займаў пасаду загадчыка лабараторыі і адначасова з’яўляўся прафесарам кафедры дынамічнай геалогіі Беларускага дзяржаўнага ўніверсітэта.

Пасаду дырэктара Інстытута праблем выкарыстання прыродных рэсурсаў і экалогіі (цяпер Інстытут прыродакарыстання) НАН Беларусі А.К. Карабанаў атрымаў у 2008 г. Інстытут займаецца даследаваннямі ў галіне ашчаднага выкарыстання прыродных рэсурсаў, экалогіі і аховы навакольнага асяроддзя.

Асноўнымі напрамкамі навуковых даследаванняў А.К. Карабанава з'яўляюцца неатэктоніка, геадынаміка, чацвярцічная геалогія, геамарфалогія і палеаграфія. Аляксандр Кірылавіч унёс значны ўклад у вывучэнне геалогіі кайназоя тэрыторыі Беларусі, выявіў заканамернасці будовы найноўшых геалагічных фармацый і эвалюцыю буйных формаў рэльефу, распрацаваў комплексную методыку рэканструкцыі амплітуд тэктанічных рухаў у вобласці старажытнамацерыковага зледзянення. Ён прапанаваў канцэпцыю неатэктанічных эвалюцый і найноўшай геадынамікі тэрыторыі Беларусі і сумежных абласцей Усходне-Еўрапейскай платформы, вызначыў заканамернасці эвалюцыі поля напружванняў ў зямной кары тэрыторыі Беларусі і выявіў сетку актыўных разрыўных парушэнняў і формы іх праявы ў будове кайназойскіх адкладаў і рэльефе тэрыторыі Беларусі і сумежных рэгіёнаў, паказаў сувязь актыўных разрыўных парушэнняў з характарам рэгіянальнай сейсмічнасці і размяшчэннем зон магчымага ўзнікнення ачагоў землятрусаў.

Вынікі даследаванняў А.К. Карабанава маюць вялікае значэнне для практыкі правядзення геалагічных здымкаў, ацэнкі сейсмічнай небяспекі, абгрунтавання выбару пляцовак для будаўніцтва асабліва адказных інжынерных збудаванняў з улікам геалагічных і сейсматэктанічных паказчыкаў.

Агульны стаж навукоўца складае 45 гадоў. За гэты перыяд А.К. Карабанаў апублікаваў 173 працы, у тым ліку 11 манаграфій і 2 вучэбных дапаможніка, падрыхтаваў кандыдата навук. Навуковыя дасягненні і плённая асветніцкая дзейнасць А.К. Карабанава быді адзначаны прэміяй НАН Беларусі (2008) і медалём «За працоўную доблесць».

Матэрыял падрыхтаваны ў 2012 г.