Серакоў Іван Сцяпанавіч – доктар сельскагаспадарчых навук, прафесар, акадэмік – з'яўляецца адным з вядучых вучоных Беларусі ў галіне вітаміннага і мінеральнага харчавання сельскагаспадарчых жывёл і птушкі. Ён нарадзіўся ў в. Язычкава Дрыбінскага раёна Магілёўскай вобласці. Пасля заканчэння сярэдняй школы ў 1966 г. паступіў на заатэхнічны факультэт Беларускай сельскагаспадарчай акадэміі (БСГА). З лютага 1971 г. па кастрычнік 1973 г. працаваў галоўным заатэхнікам племсаўгаса імя Чкалава Горацкага раёна, потым навуковым супрацоўнікам, загадчыкам аддзела прэміксаў доследнай станцыі (БСГА, 1973–1988). У студзені 1982 г. абараніў кандыдацкую дысертацыю на тэму «Экспериментальное обоснование комплексного применения витаминов U и B12 в рационах молодняка свиней». У 1982 г. вучонаму была прысуджана ступень кандыдата сельскагаспадарчых навук, у 1985 г. ён атрымаў званне старшага навуковага супрацоўніка. У 1988 г. абраны па конкурсе на пасаду дацэнта кафедры фізіялогіі, біятэхналогіі і ветэрынарыі. У 1991 г. І.С. Серакову было прысвоена вучонае званне дацэнта. У 1993 г. ён стаў загадчыкам кафедры заагігіены, экалогіі і мікрабіялогіі. У снежні 1997 г. абараніў доктарскую дысертацыю на тэму «Теоретические и практические аспекты использования витаминов U, В12 и коэнзима B12 в рационах свиней». У 1998 г. І.С. Серакову была прысуджана ступень доктара сельскагаспадарчых навук, а ў кастрычніку 1999 г. прысвоена вучонае званне прафесара. З снежня 1998 г. ён працаваў на кафедры заагігіены, экалогіі і мікрабіялогіі, з ліпеня 2005 г. загадчыкам кафедры свінагадоўлі і дробнай жывёлагадоўлі.

Пад кіраўніцтвам І. С. Серакава створана навуковая школа па тэарэтычным і практычным аспектах выкарыстання вітамінаў новага пакалення ў жывёлагадоўлі, якая падтрымлівае цесныя сувязі з Інстытутам біяхіміі імя А.М. Баха і Мардоўскім дзяржаўным універсітэтам (Расія), Украінскім нацыянальным аграрным універсітэтам, Інстытутам біялогіі Акадэміі навук Латвіі. Вучоны падрыхтаваў 9 кандыдатаў сельскагаспадарчых навук, апублікаваў 220 навуковых прац, у тым ліку 23 падручнікі і навучальныя дапаможнікі.

Іван Сцяпанавіч Серакоў – член-карэспандэнт Міжнароднай акадэміі аграрнай адукацыі (2000) і Міжнароднай акадэміі ветэрынарных навук (2000), акадэмік Акадэміі навук сельскай і лясной гаспадаркі Латвіі (2003). У 2007 г. з'яўляўся дэлегатам I з'езду навукоўцаў Беларусі. Па выніках конкурсу сярод дзеячаў навукі, адукацыі, культуры і аховы здароўя за дасягненне выдатных вынікаў у прафесійнай дзейнасці яму ў 2002 г. была прызначана стыпендыя Прэзідэнта Рэспублікі Беларусь. Ён узнагароджаны шматлікімі граматамі, у жніўні 1996 г. атрымаў знак «Выдатнік адукацыі Рэспублікі Беларусь».

Матэрыял падрыхтаваны УК «Магілёўская абласная бібліятэка імя У.І. Леніна» ў 2016 г.