Козак Аляксандр Аляксандравіч

Дата нараджэння: 08.03.1952 Цыбкі, в., Драгічынскі раён, Брэсцкая вобласць

Кароткая даведка: акцёр, рэжысёр, тэатральны дзеяч, заслужаны дзеяч мастацтваў Беларусі, дырэктар і мастацкі кіраўнік Брэсцкага акадэмічнага тэатра драмы імя Ленінскага камсамола Беларусі, дырэктар Міжнароднага тэатральнага фестывалю "Белая Вежа" (Брэст), кавалер ордэна Дружбы

Імёны на іншых мовах: Козак Александр Александович (руская);

Аляксандр Аляксандравiч Козак нарадзiўся 8 сакавiка 1952 г. у в. Цыбкi на Брэстчыне. Скончыў Беларускi тэатральна-мастацкi iнстытут: у 1973 г. – курс В. Рэдліх, у 1990 г. – аддзяленне арганiзацыі планавання і кіравання тэатральнай справай.

З 1973 г. працаваў акцёрам у Брэсцкім акадэмiчным тэатры драмы iмя Ленiнскага камсамола Беларусi. Яркія знешнія даныя А. Козака спрыялі стварэнню пераканаўчых вобразаў маладых герояў. Сярод найбольш значных яго роляў у нацыянальным рэпертуары: Наганаў (“Брэсцкая крэпасць” К. Губарэвіча), Якаў (“Пакажыце пропуск” Я. Шабана), Кірыл (“І змоўклі птушкі” І. Шамякіна), Масей (“Апраўданне крыві” паводле І. Чыгрынава), значным дасягненнем стала роля Фердынанда (“Дзень цудоўных падманаў” Р. Шэрыдана). Сярод іншых роляў: Колесаў (“Развітанне ў чэрвені” А. Вампілава), Навуковец (“Раён пасадкі невядомы” В. Губарава), Сітнік (“Бярозавая галіна” Ю. Візбара), Коба (“Дзеці Арбата” А. Рыбакова).

З 1988 г. А.А. Козак быў прызначаны на пасаду дырэктара тэатра, які ў гэты перыяд зачыніўся на рэканструкцыю. Дзякуючы намаганням і ўдаламу кіраўніцтву Аляксандра Аляксандравiча калектыў не спыняў творчага працэсу і для кожнай сцэны, на якой даводзілася выступаць, рыхтаваў адмысловыя спектаклі. З 1994 г. А.А. Козак – генеральны дырэктар і мастацкі кiраўнік тэатра. У якасцi рэжысёра-пастаноўшчыка А.А. Козак стварыў каля дзясятка спектакляў, сярод якіх: “Убей меня, голубчик” (2004), “Мост” (2005), “Вечер” (2007), “Барские причуды” (2011) i iнш.

Аляксандр Аляксандравiч таксама вядомы ў Брэсце як актыўны дзеяч культуры. З 1996 г. ён з’яўляецца арганізатарам і дырэктарам маштабнага праекта – Міжнароднага тэатральнага фестывалю “Белая Вежа”, які больш чым за 15 гадоў свайго існавання ператварыў горад над Бугам у нефармальную тэатральную сталіцу Беларусі. У 1997 г. А.А. Козаку было прысуджана ганаровае званне “Брэстчанiн года”, а праз год – ганаровае званне “Заслужаны дзеяч мастацтваў Беларусi”. У 2010 г. акцёр і рэжысёр быў абраны акадэмікам Мiжнароднай Акадэмii Тэатра з уручэннем дыплома “За выдатныя дасягненні ў тэатральным мастацтве, кіно і тэлебачанні”.

Матэрыял падрыхтаваны Брэсцкай абласной бiблiятэкай iмя М. Горкага ў 2012 г.