Юрый Уладзіміравіч Азаронак нарадзіўся ў в. Рудня Гарадоцкага раёна Віцебскай вобласці. У 1994 г. скончыў Беларускую дзяржаўную акадэмію мастацтваў. З 1995 г. працаваў на кінастудыі «Беларусфільм». У 1999 г. быў галоўным рэдактарам мастацкіх праграм Беларускага тэлебачання. У 2000 г. стаў загадчыкам літаратурна-драматычнай рэдакцыі Нацыянальнай дзяржаўнай тэлерадыёкампаніі. У 2001 г. Ю. Азаронак займаў пасаду кіраўніка інфармацыйнага аддзела Беларускага патрыятычнага саюза моладзі. У красавіку 2003 г. прызначаны прэс-сакратаром Генеральнай пракуратуры Рэспублікі Беларусь. З 2005 па 2008 г. з'яўляўся намеснікам старшыні Нацыянальнай дзяржаўнай тэлерадыёкампаніі Рэспублікі Беларусь. У 2009 г. Ю. Азаронак кіраваў тэлеканалам «Жэст-ТБ» (для глухіх і людзей, якія слаба чуюць).

Набыў вядомасць пасля выхаду на тэлеэкраны дакументальнага фільма «Нянавісць. Дзеці ілжы» (1994). Сярод работ: фільмы «Мяне хочуць забіць» (1991), «Бал сатаны» (1993), «Маналог пасля смерці» (1994), «Смяротны грэх» (1995), «Тайныя спружыны палітыкі» (2001), «Канспіралогія» (2004), «Духоўная вайна» (2006) і інш.

У 2007 г. Ю. Азаронку было прысвоена ганаровае званне «Заслужаны дзеяч культуры Рэспублікі Беларусь». Ён з'яўляецца лаўрэатам спецыяльнай прэміі Прэзідэнта Рэспублікі Беларусь (2004) і прэміі «За духоўнае адраджэнне» (2005), у 2006 г. атрымаў спецыяльны дыплом «За маральныя iдэалы ў кiнамастацтве» Парламенцкага сходу Саюза Беларусi i Расii.

Матэрыял падрыхтаваны УК «Магілёўская абласная бібліятэка імя У.І. Леніна» ў 2017 г.