Нямецкі картограф, гравёр і жывапісец Антоній Від (Вед) нарадзіўся ў герцагстве Пфальц (Германія). З 1535 г. жыў у Данцыгу (цяпер Гданьск, Польшча). Антоній Від – аўтар карты, на якой адлюстравана частка Вялікага Княства Літоўскага і Маскоўскага вялікага княства – першай вядомай геаграфічнай карты, створанай і выдадзенай на тэрыторыі ВКЛ. На яе нанесены стратэгічныя замкі памежжа ВКЛ і Маскоўскай дзяржавы (Веліж, Віцебск, Гомель, Кіеў, Крычаў, Орша, Полацк, Смаленск), пададзена інфармацыя пра Аршанскую бітву 1514 г. Антоній Від працаваў над картай разам былым акольнічым маскоўскага цара Васіля III Іванам Ляцкім у перыяд з 1537 па 1542 гг., скарыстаўшы картаграфічныя матэрыялы, вывезеныя Ляцкім з Масквы у 1534 г. Першае выданне карты было здзейснена ў Антвэрпэне каля 1542 г., другое – у Вільні ў 1555 г. Доўгі час выданне лічылася страчаным, аднак у канцы XIX ст. адшукалася ў Гамбургу. Карта з’яўляецца найбольш раннім помнікам старабеларускага свецкага друку – тлумачальны тэкст да яе напісаны на старабеларускай мове.

Пасля завяршэння работы над картай Антоній Від у 1545–1546 гг. жыў і працаваў у Вільні, дзе выконваў мастацкія работы (карціны палявання на зуброў) для караля польскага і вялікага князя літоўскага Жыгімонта II Аўгуста.

Матэрыял падрыхтаваны ў 2020 г.