Заснавальнікам часопіса “Родная прырода” з'яўляецца Міністэрства прыродных рэсурсаў і аховы навакольнага асяроддзя Рэспублікі Беларусь. Выдаўцом з 1 жніўня 2009 г. стала ААТ “Народная газета”, якая мае вялікі вопыт работы па экалагічнай тэматыцы. “Родная прырода” асвятляе пытанні аховы прыроды, узаемаадносін чалавека і навакольнага асяроддзя, міжнароднага прыродаахоўнага супрацоўніцтва, інфармуе насельніцтва аб выкананні дзяржаўных экалагічных праграм, прапагандуе вопыт рацыянальнага выкарыстання зямельных і водных рэсурсаў, расліннага і жывёльнага свету, разглядае шляхі паляпшэння санітарнага стану населеных месцаў, мае трывалыя традыцыі экалагічнага выхавання і адукацыі чытачоў. Тыраж часопіса складае 2916 экзэмпляраў (№ 11, 2011 г.).

Выпуск “Роднай прыроды” ажыццяўляецца ў Мінску са студзеня 1972 г. Да 1977 г. часопіс лічыўся інфармацыйна-метадычным бюлетэнем. Да 1990 г. выходзіў на беларускай мове раз у 2 месяцы (зараз выдаецца на беларускай і рускай мовах, перыядычнасць – 1 раз у месяц). На старонках “Роднай прыроды” закранаюцца праблемы глабальнага змянення клімату, чысціні вады і атмасфернага паветра, абыходжання з адходамі. Шмат увагі надаецца ахоўным прыродным тэрыторыям, рэдкім і знікаючым відам флоры і фаўны, уключаных у Чырвоную кнігу Рэспублікі Беларусь, барацьбе з браканьерствам. Асвятляюцца пытанні, якія датычацца развіцця беларускага турызму. Часопіс уключае таксама матэрыялы аб маляўнічых кутках беларускай прыроды, аматарах яе аховы, экскурсіях, тэматычныя вершы і апавяданні і інш. Друкуюцца творы вядомых беларускіх пісьменнікаў і паэтаў П. Броўкі, А. Куляшова, М. Лынькова, П. Панчанкі, А. Астрэйкі, Р. Барадуліна і інш. Штомесячна змяшчаюцца тэматычныя ўкладкі, якія з'яўляюцца цудоўнымі памочнікамі для грыбнікоў, ягаднікаў, рыбакоў, турыстаў і следапытаў.

Навукова-папулярны часопіс вучыць па-гаспадарску выкарыстоўваць дары прыроды, берагчы і ўзбагачаць яе чароўную красу. Рэдакцыя выдання падтрымлівае ўсіх, хто неабыякавы да лёсу роднага краю. Менавіта таму на старонках “Роднай прыроды” часта можна ўбачыць новыя імёны: сваімі назіраннямі і фотаработамі шчодра дзеляцца чытачы.

Матэрыял падрыхтаваны ў 2011 г.