Адзін з вядучых прафесійных музычных калектываў краіны Дзяржаўны акадэмічны сімфанічны аркестр Рэспублікі Беларусь быў заснаваны ў красавіку 1927 г. у Мінску пры Беларускім радыёцэнтры на аснове аркестраў Беларускага музычнага тэхнікума і Першага беларускага дзяржаўнага тэатра (БДТ-1). Арганізацыю аркестра даручылі вядомаму ў рэспубліцы скрыпачу і дырыжору А. Бяссмертнаму. Запрошаныя ім лепшыя музыканты (у асноўным выкладчыкі Беларускага музычнага тэхнікума і артысты аркестра БДТ-1) працавалі з вялікім натхненнем. 13 студзеня 1929 г. пасля карпатлівых рэпетыцый і асобных выступленняў у Мінску, у Доме селяніна, адбыўся першы адкрыты канцэрт сімфанічнага аркестра Беларускага радыёцэнтра. Выконваліся творы Ф. Шуберта, Дж. Расіні, Э. Грыга, М. Мусаргскага, М. Іпалітава-Іванава. Восенню таго ж года адкрыўся першы зімовы канцэртны сезон, у якім удзельнічалі выдатныя дырыжоры і салісты. З аркестрам выступалі расійскі кампазітар Р. Гліэр, нямецкі дырыжор Р. Махаўпт, аўстрыйскі піяніст Р. Готліб, чэшскі дырыжор Б. Вран, італьянскі дырыжор К. Сабаіна, амерыканскі дырыжор В. Савіч і інш. Аднак галоўнай задачай калектыву была прапаганда музыкі беларускіх кампазітараў. У пачатку 1930-х гг. аркестр стаў першым выканаўцам амаль усіх твораў, што з’яўляліся ў рэспубліцы ў той перыяд. Сярод іх былі Першая сімфонія Я. Цікоцкага, опера М. Аладава «Тарас на Парнасе», яго ж Другая сімфонія і ўверцюра-фантазія «Зары насустрач», «Беларуская сюіта» А. Туранкова, сімфанічныя творы Р. Пукста, В. Залатарова. У праграмах аркестра пачалі штогод гучаць новыя беларускія музычныя творы.

У 1937 г. пачала сваю дзейнасць Беларуская дзяржаўная філармонія, і сімфанічны аркестр увайшоў у яе склад. Калектыў узначаліў вядомы расійскі дырыжор І. Мусін. У час яго працы прагучалі сімфоніі А. Скрабіна, Г. Берліёза, Ф. Ліста, П. Дзюка і інш. Пад кіраўніцтвам І. Мусіна аркестр удзельнічаў у Першай дэкадзе беларускага мастацтва і літаратуры ў Маскве, якая адбылася ў 1940 г. Далейшая творчая дзейнасць аркестра была спынена: пачалася Вялікая Айчынная вайна.

У пасляваенныя гады ў калектыў прыйшлі маладыя музыканты – выхаванцы Беларускай дзяржаўнай кансерваторыі. 21 верасня 1946 г. галоўны дырыжор аркестра Т. Каламійцава адкрыла першы сезон пасля доўгага перапынку. У 1947 г. калектыў узначаліў М. Шнейдэрман. Пры ім аркестр значна павялічыў свой рэпертуар. Добрым памочнікам быў канцэртмайстар Б. Афанасьеў, які з 1952 г. сам стаў за дырыжорскі пульт. У 1956 г. на пасаду галоўнага дырыжора запрошаны выпускнік Маскоўскай дзяржаўнай кансерваторыі імя П.І. Чайкоўскага В. Дуброўскі. Новы кіраўнік асаблівую ўвагу ўдзяляў рабоце над інтанацыяй і ансамблем, выраўноўванню гукавога балансу аркестравых груп. Даволі хутка такая работа прынесла свой плён. У 1957 г. на Усесаюзным фестывалі тэатраў і музычных ансамбляў калектыў быў удастоены дыплома I ступені. У 1961 г. атрымаў назву «Дзяржаўны сімфанічны аркестр БССР». Пазней з калектывам працавалі спачатку В. Катаеў, потым Ю. Яфімаў. Кожны з іх унёс значны ўклад у развіццё аркестра. У 1980 г. калектыву было прысвоена ганаровае званне акадэмічнага.

У гады перабудовы становішча аркестра пагоршылася. Былі адменены ўсе гастролі, калектыў застаўся без кіраўніка, а многія музыканты пакінулі краіну і пачалі працаваць у іншых аркестрах. Толькі ў 1997 г. мінская публіка ўбачыла выступленне Дзяржаўнага акадэмічнага сімфанічнага аркестра Рэспублікі Беларусь пад кіраўніцтвам М. Каца. Пачалася ажыўленая творчая праца. Новы кіраўнік здолеў развіць лепшыя якасці калектыву і дабіцца адчувальных вынікаў. Большасць выступленняў адзначалася эмацыянальнасцю, пачуццём стылю, высокай культурай, артыстызмам. Яркімі старонкамі ў гісторыю культурнага жыцця Беларусі ўпісаны выступленні аркестра з выдатнымі музыкантамі ХХ ст. – С. Рыхтэрам, М. Растраповічам, Э. Гілельсам, Л. Коганам, Н. Гутман, М. Майскім, Г. Крэмерам, І. Мянухіным, В. Ашкеназі, В. Клібернам і інш.

З верасня 2001 г. мастацкім кіраўніком і галоўным дырыжорам Дзяржаўнага акадэмічнага сімфанічнага аркестра Рэспублікі Беларусь з’яўляецца А. Анісімаў. Калектыў заўсёды знаходзіцца ў творчым пошуку, пастаянна папаўняе свой рэпертуар, у які ўваходзяць розныя творы ад класічнай сімфанічнай музыкі да работ сучасных беларускіх, рускіх і заходнееўрапейскіх аўтараў. Канцэрты аркестра збіраюць поўныя залы і заўсёды маюць велізарны поспех. Калектыў добра вядомы ў краінах блізкага і далёкага замежжа. Выступленні аркестра заўсёды становяцца прыкметнай падзеяй у жыцці беларускай сталіцы.

Матэрыял падрыхтаваны ў 2016 г.