Гісторыя прадпрыемства пачалася ў 1960 г., калі ў Навагрудку (Гродзенская вобласць) быў створаны завод "Металіст" са спецыялізацыяй на металаапрацоўцы. У 1966 г. ён увайшоў у склад Міністэрства газавай прамысловасці СССР і быў перайменаваны ў Навагрудскі завод газавай апаратуры. Прадпрыемства выпускала бытавыя газавыя балоны і запорна-рэдукаваную апаратуру да іх (вентылі, клапаны, рэгулятары ціску). З 1978 г. засвоена серыйная вытворчасць газавых гарэлак, газавых і тэрмастатычных кранаў для бытавых газавых пліт. У далейшым завод прыступіў да выпуску парашковых вогнетушыцеляў закачнога тыпу, аўтаматыкі бяспекі да вадаправодных газавых награвальнікаў. У 1989 г. была распрацавана канструкцыя і засвоена вытворчасць газабалоннай апаратуры для пераводу аўтатранспарту на звадкаваны нафтавы газ. Гэты выраб стаў базавай мадэллю для далейшай распрацоўкі шматлікіх мадыфікацый газабалоннай апаратуры для легкавога і грузавога аўтатранспарту, які працуе як на звадкаваным нафтавым, так і на сціснутым прыродным газе.

У цяперашні час адкрытае акцыянернае таварыства "Навагрудскі завод газавай апаратуры" ўваходзіць у склад канцэрна “Белпалівагаз”. Завод з’яўляецца адным з буйных высокаспецыялізаваных прадпрыемстваў Беларусі па выпуску шырокага спектру газавай апаратуры: бытавых газавых балонаў, запорна-рэдукаванай апаратуры, аўтаматыкі бяспекі і камплектуючых да газавых пліт, апаратуры для пераводу легкавых і грузавых аўтамабіляў на звадкаваны і сціснуты газ, лічыльнікаў газу, парашковых вогнетушыцелей і інш. Прадпрыемства з’яўляецца пераможцам у І Рэспубліканскім конкурсе на суісканне прэміі за дасягненні ў галіне развіцця прамысловых тэхналогій "Лідэры прамысловасці Рэспублікі Беларусь – 2023", лаўрэатам Прэміі Урада Рэспублікі Беларусь за дасягненні ў галіне якасці (2016).

Матэрыял падрыхтаваны ААТ “Навагрудскі завод газавай апаратуры” у 2009 г., актуалізаваны ў 2024 г.