Дата пачатку:
пад 1159 Чачэрскі раён, Гомельская вобласць
Кароткая даведка:
горад, цэнтр раёна Гомельскай вобласці
Назвы на іншых мовах:
Чечерск (руская);
Папярэднія назвы:
Чичерск
2734 сімвалы
Даведка
Чачэрск – адзін з самых старажытных гарадоў Беларусі. Упершыню згадваецца ў Іпацьеўскім летапісе пад 1159 г. У XII–XIII стст. Чачэрск уваходзіў у Чарнігаўскае княства. З сярэдзіны XIV ст. з’яўляўся цэнтрам воласці ў ВКЛ, з 1509 г. – мястэчкам Віленскага ваяводства. Па некаторых звестках у 1510 г. у цэнтры горада была ўзведзена драўляная ратуша, што ўскосна сведчыць аб тым, што горад меў магдэбургскае права. З сярэдзіны XIV ст. і да 1774 г. Чачэрск знаходзіўся ў складзе Вялікага Княства Літоўскага, а затым Рэчы Паспалітай.
З 1772 г., пасля першага падзелу Рэчы Паспалітай, быў далучаны да Расійскай Імперыі. У 1774 г. Чачэрскае староства было падорана беларускаму генерал-губернатару графу З.Г. Чарнышову, які стварыў тут прыгонны тэатр і аркестр, а так сама ўнікальны архітэктурны ансамбль, які складаецца з каменнай ратушы, трох праваслаўных цэркваў і каталіцкага касцёла.
Каля 1780 г. у мястэчку заснавана шкломануфактура, прадукцыя якой (бутэлькі, багемнае, белае ліставое і аконнае шкло і інш.) збывалася ў Пецярбургу. На прамысловай выстаўцы (Масква, 1859) і Усерасійскай (Масква, 1860) чачэрскае шкло было прызнана лепшым і адзначана за добрую якасць.
Развіццё горада паскорылася пасля адмены прыгоннага права. Расшырыўся і гандаль – з чачэрскай прыстані па Сожы цяпер адпраўлялася грузаў больш, чым паступала сюды. Адкрыліся два народныя вучылішчы – мужчынскае і жаночае, бальніца.
З 1919 г. Чачэрск у складзе Гомельскай губерні РСФСР. З 1926 г. – у складзе БССР, цэнтр Чачэрскага раёна, з 1938 г. – гарадскі пасёлак.
Далейшае развіццё было спынена Вялікай Айчыннай вайной. Ужо ў жніўні 1941 г. гітлераўцы акупіравалі тэрыторыю, усталяваўшы жорсткі рэжым гвалту: палілі вёскі, расстрэльвалі мірных жыхароў, стварылі лагер для ваеннапалонных.
27 лістапада 1943 г. Чачэрск быў вызвалены ад нямецка-фашысцкіх захопнікаў войскамі Беларускага фронту.
У пасляваенныя гады Чачэрск і раён былі адроджаны самаадданай працай яго жыхароў, а новыя пакаленні прымнажаюць яго славу.
Трагедыяй для жыхароў Чачэрска павярнулася аварыя, якая адбылася 26 красавіка 1986 г. на Чарнобыльскай атамнай электрастанцыі.
Чачэрск узгадаваў многіх выдатных дзеячаў і знакамітых людзей, якія прынеслі славу і вядомасць нашай краіне. Гэта дзяржаўны дзеяч Я.Н. Каган, заслужаны дзеяч мастацтваў Рэспублікі Беларусь Уладзімір Караткевіч, майстар спорту па грэка-рымскай барацьбе В.С.Секуноў, майстар спорту па вольнай барацьбе І.В. Сотнікаў і майстар спорту па шашэйных трэкавых велагонках У.Я. Сярогаў мастачка Н.Я. Паплаўская, народная артыстка Беларусі Л.К. Корхава, заслужаныя настаўнікі Беларусі Л.М. Вінцэўская і Г.І. Мусакоў.