Заказнік-журавіннік (з 2007 г. – біялагічны заказнік рэспубліканскага значэння) “Букчанскі” быў створаны ў Лельчыцкім раёне Гомельскай вобласці ў 1979 г. Мэтай заснавання стала захаванне ў прыродным стане месцаў росту журавін.

Плошча ахоўнай тэрыторыі складае 4,9 тыс. га. Большая частка занята балотам вярховага тыпу Тапілаўскім. Цэнтральная частка бязлесная. На ўскраінах растуць хваёвыя, бярозавыя, чорнаальховыя, асінавыя і дубовыя лясы балотнага тыпу. У складзе флоры зарэгістраваны 481 від сасудзістых раслін, з якіх вярба чарнічная, бабок трохлісты, чаротнік белы, лілея кучаравістая з’яўляюцца ахоўнымі. Значную частку тэрыторыі займаюць журавіны, збор якіх дасягае 50–100 т штогод. У межах заказніка зарэгістраваны 81 від наземных пазваночных жывёл. З іх у Чырвоную кнігу Рэспублікі Беларусь унесены барсук, чорны бусел, шэры журавель, малы падворлік, змеяед.

Матэрыял падрыхтаваны ў 2023 г.