Адкрытае акцыянернае таварыства “Беллакт” пачало працаваць у Ваўкавыску (Гродзенская вобласць) у 1970 г. як малочна-кансервавы камбінат дзіцячых прадуктаў. Прадпрыемства аб’яднала Ваўкавыскі, Свіслацкі, Зэльвенскі і Пескаўскі масла- і сыраробныя заводы. Абсталяванне для камбіната было пастаўлена французкай фірмай “Сіфаль” – аднаго з сусветных лідараў у аснашчэнні малочных заводаў. Упершыню ў малочна-кансервавай прамысловасці Беларусі была запушчана вытворчасць з дыстанцыйным аўтаматычным кіраваннем усімі тэхналагічнымі працэсамі па зададзенай праграме. Навінкамі сталі вакуум-выпарная ўстаноўка, праматочная распыліцельная сушылка, аўтаматычны малакаачышчальнік, сістэма пнеўматычнай транспарціроўкі і расфасоўкі прадукцыі. Праз месяц пасля запуску вытворчасці ў продаж паступілі першыя дзіцячыя сумесі “Малютка” і “Малыш”, праз год прадпрыемства выйшла на праектную магутнасць і перапрацоўвала ўжо 300 т малака ў суткі.

У далейшым вытворчасць пастаянна ўдасканальвалася. Для забеспячэння высокай якасці сыравіны, якую атрымлівалі ад больш чым 100 мясцовых пастаўшчыкоў, прадпрыемства на свае сродкі закупіла і ўсталявала для найбольш буйных з іх халадзільныя ўстаноўкі, арганізавала цэнтралізаваны вываз малака ўласнымі малакавозамі. Пашыраўся асартымент выпускаемай прадукцыі. Пачалася вытворчасць сметанковага масла, сухога малака, малочных каш, сумесей для хворых дзяцей, запушчаны цэх па вытворчасці заменніка неразведзенага малака (1977). Выдатныя паказчыкі працы калектыву неаднаразова адзначаліся на выстаўках дасягненняў народнай гаспадаркі СССР, прадпрыемства было ўзнагароджана ордэнам Працоўнага Чырвонага Сцяга (1976), Ганаровай граматай Вярхоўнага Савета БССР (1978). У 1980-я гг. фірмай “Сіфаль” была праведзена рэканструкцыя абсталявання, што павялічыла магутнасці прадпрыемства на 30%. У выніку малочна-кансервавы камбінат пачаў перапрацоўваць за суткі 541 т малака, з якога вырабляў 24 т дзіцячага харчавання, 9 т сухога малака, 35 т цэльнамалочнай прадукцыі, 10 т масла і 3 т марожанага. Колькасць выпускаемых відаў прадукцыі павялічылася да 35 найменняў.

У 1991 г. камбінат атрымаў статус арэнднага прадпрыемства і стаў называцца “Беллакт”. У гэты перыяд ішоў пошук новых напрамкаў развіцця вытворчасці і рэалізацыі прадукцыі. Асартымент пашырыўся малаком згушчаным і вітамінізаваным, сырам, ёгуртам, тварагом, маянэзам, харчаваннем для цяжарных і кормячых жанчын, неданошаных дзяцей, малочным цукрам, кашамі хуткага прыгатавання, безалкагольнымі напіткамі, кукурузнымі палачкамі і інш. Былі арганізаваны радыеметрычны кантроль, лабараторыі па вызначэнні патагенных мікраарганізмаў і таксікалагічная, створана ўласная гандлёвая сетка, праведзена мадэрнізацыя абсталявання.

У цяперашні час ААТ “Беллакт” – гэта сучасная, высокатэхналагічная кампанія з шырокім асартыментам выпускаемай прадукцыі. Тут дзейнічаюць цэльнамалочны, кансервавы, кампрэсарны і транспартны цэхі, аддзелы сыравінны, забеспячэння, стратэгічнага развіцця і знешнеэканамічных сувязей, службы продажу, інжынерна-тэхнічная і інш. У супрацоўніцтве з навуковымі ўстановамі даследчы цэнтр прадпрыемства вядзе ўдасканальванне рэцэптаў і тэхналогій прыгатавання малочных прадуктаў і іх заменнікаў, забяспечвае высокі ўзровень якасці. Кампанія пастаянна ўдзельнічае ў рэспубліканскіх і міжнародных выстаўках, дзе яе прадукцыя адзначана шматлікі дыпломамі і медалямі. ААТ “Беллакт” з’яўляецца таксама лаўрэатам Прэміі Урада Рэспублікі Беларусь за дасягненні ў галіне якасці (2011, 2022), пераможцам конкурсаў “Выбар года”, “Прадукт года”, “Лепшыя тавары Рэспублікі Беларусь”, “Лепшая прадукцыя года” і інш.

Матэрыял падрыхтаваны ў 2025 г.