ААТ «Чырвоны барацьбіт» – адзін з буйнейшых на постсавецкай прасторы заводаў па вытворчасці металаапрацоўчага абсталявання. Ён быў заснаваны ў 1900 г. у Оршы мяшчанамі І.Б. Славінскім і С.П. Ясінскім як група механічных майстэрняў па вырабе сельскагаспадарчага інвентару, катлоў, бочак, рамонту абсталявання для млыноў, вінакурных заводаў. У 1914 г. майстэрні развіліся да ўзроўню завода, які ў 1919 г. перайшоў ва ўласнасць дзяржавы. У 1928 г. прадпрыемства атрымала назву «Механічны і чыгуналіцейны завод “Чырвоны барацьбіт”». Да 1941 г. ён дасягнуў узроўню буйнога прамысловага прадпрыемства, якое вырабляла і рамантавала сельскагаспадарчую тэхніку, запасныя часткі да яе, станковае абсталяванне і тавары народнага спажывання.

У час Вялікай Айчыннай вайны завод быў эвакуіраваны на Урал (г. Рэж, Свярдлоўская вобласць), дзе ажыццяўляўся выпуск боепрыпасаў для фронту. Будынак прадпрыемства быў цалкам разбураны, але ў 1946 г. адноўлены. Адразу наладзілі выпуск фугавальных, даўбёжна-фрэзерных і свідравальных станкоў. У далейшым пералік прадукцыі пашырыўся, завод стаў выпускаць высокаякасныя комплексы для тарфяной прамысловасці. У 1959 г. была праведзена рэарганізацыя завода, у выніку якой адбылося перапрафіляванне і наладжванне выпуску новага віду прадукцыі – плоскашліфавальных станкоў высокай дакладнасці. У 1966 г. гэты від прадукцыі адзначаны Залатым медалём, а ў 1967 г. першым сярод металарэзных станкоў у СССР атрымаў Дзяржаўны знак якасці. У 1971 г. за высокі ўзровень тэхналогіі вытворчасці група супрацоўнікаў прадпрыемства была ўзнагароджана Дзяржаўнай прэміяй СССР у галіне тэхнікі. У гэтым жа годзе завод атрымаў ордэн Працоўнага Чырвонага Сцяга. У 1990-я гг. у сувязі з нізкім попытам на шліфавальныя станкі завод арыентаваўся на выраб машын лазернай рэзкі, каменяапрацоўчага абсталявання, станкоў малой механізацыі, дрэваапрацоўчых станкоў і інш. Аднак, нягледзячы на цяжкія эканамічныя абставіны, працягваўся выраб прэцызійных шліфавальных станкоў.

У 2000 г. «Чырвоны барацьбіт» першым са станкабудаўнічых прадпрыемстваў Беларусі прайшоў сертыфікацыю на адпаведнасць міжнароднаму стандарту ІСА 9001-96. З 2001 г. завод з’яўляецца рэспубліканскім унітарным вытворчым прадпрыемствам з сучаснай назвай. Асноўнымі напрамкамі яго дзейнасці з’яўляецца выпуск фрэзерных станкоў, крывашыпна-шатунных прэсаў, тачыльна-шліфавальных, пілазаточных, свідравальна-фрэзерных, настольна-свідравальных, тачыльных шліфавальна-паліравальных станкоў і гнуткавых машын. Дзякуючы заводу атрымала развіццё стварэнне высокааўтамытазаванага абсталявання, якое валодае тэхналагічнай гібкасцю і дакладнасцю незалежна ад кваліфікацыі рабочага. Прадукцыя прадпрыемства экспартуецца ў Расію, Германію, Турцыю, Чэхію, Іспанію, Францыю, Егіпет, Італію, Фінляндыю, Іран, Грэцыю і інш.

ААТ «Чырвоны барацьбіт» – лаўрэат прэмій Міністэрства прамысловасці Рэспублікі Беларусь, Віцебскага аблвыканка, Урада Рэспублікі Беларусь за дасягненні ў галіне якасці (2000, 2010, 2015).

Матэрыял падрыхтаваны ў 2020 г.