Рукапісныя зборнікі, помнікі ўсходне-славянскай пісьменнасці. Да ХІХ ст. рукапісы захоўваліся ў бібліятэцы Супрасльскага манастыра (цяпер Польшча). Найбольш вядомыя і каштоўныя:

Зборнік жыцій і пропаведзяў ХІ ст., створаны ў Паўночна-Усходняй Балгарыі, напісаны на стараславянскай мове на пергаменце (285 лістоў). Адзін з самых старажытных помнікаў славянскага пісьменства. Адкрыў і даследаваў яго М. К. Баброўскі. У 2007 г. ЮНЕСКА ўключыла зборнік у рэестр "Памяць свету".

Летапісны зборнік першай паловы XVI ст., у які ўваходзяць рускі скарочаны летапіс, прысвечаны гісторыі Русі да 1382 г., запісы пра падзеі канца XV ст. у Кіеве і на Валыні.

Зборнік 1519 г. змяшчае свецкія і рэлігійныя творы, у тым ліку поўны спіс беларуска-літоўскага летапісу 1446 г., пераклад на старабеларускую мову Вісліцкага статута, Кіева-Пячэрскі патэрык і інш.

Матэрыял падрыхтаваны ў 2025 г.