9 ліпеня 1890 г. Будаўнічае аддзяленне Мінскага губернскага праўлення адобрыла праект мяшчан Бера Саламонава і Самуіла Гіршмана на ўзвядзенне ў Барысаве прадпрыемства па выпуску шведскіх запалак. Першую партыю прадукцыі Барысаўская фабрыка "Вікторыя" акцыянернай кампаніі “Саламон і Гіршман” выпусціла ўжо праз год. Гандлёвай маркай стаў леў, які стаіць на задніх лапах і абапіраецца на пачку запалак. Прадпрыемства дынамічна развівалася, прыбытак рос. З часам драўляныя карпусы былі заменены на каменныя, усталяваны паравы рухавік магутнасцю 8 конскіх сіл. На мяжы XIX-XX стст. "Вікторыя" стала адным з найбуйнейшых вытворцаў запалак у Расійскай імперыі. У 1902 г. фабрыка вырабіла 115 тыс. умоўных скрынь запалак (па 1 тыс. пачак у кожным) на суму 387 тыс. рублёў. Акрамя асноўнага віду прадукцыі, выпускаліся таксама піламатэрыялы і фанера. У 1905 г. «Вікторыя» ўвайшла ў запалкавы сіндыкат, створаны Заходнім камітэтам фабрыкантаў пры Мінскім аддзяленні Паўночнага банка. У Першую сусветную вайну прадпрыемства выконвала ваенныя заказы, пастаўляла запалкі ў армію. У 1919 г «Вікторыя» была нацыяналізавана. У часы ваенных дзеянняў абстраляванне было дэмантавана і вывезена, а вытворчыя карпусы разбураны. Пасля экспертызы, праведзенай у 1921 г., аднаўленне запалкавай фабрыкі «Вікторыя» было прызнана немэтазгодным. У нашы дні на яе месцы высяцца карпусы Барысаўскага завода агрэгатаў.

Матэрыял падрыхтаваны ў 2024 г.