Філіял "Гомельшпалеры" ААТ "Кіруючая кампанія холдынга "Беларускія шпалеры"

Дата пачатку: 1927 Гомель, г.

Кароткая даведка: прадпрыемства па вырабе шпалер, лаўрэат Прэміі Урада Рэспублікі Беларусь за дасягненні ў галіне якасці (2000)

Назвы на іншых мовах: Филиал "Гомельобои" ОАО «Управляющая компания холдинга "Белорусские обои» (руская);

Папярэднія назвы: "Гомельшпалеры", ВУП; Гомельскае акцыянернае таварыства "Гомельшпалеры"; Гомельскі папярова-лесахімічны завод; Гомельскі папярова-лесахімічны камбінат; Завод "Ізапліт"; Навабеліцкі лесахімкамбінат

Сваю гісторыю філіял "Гомельшпалеры" адкрытага акцыянернага таварыства «Кіруючая кампанія холдынга "Беларускія шпалеры"» вядзе з 1927 г., калі ў Гомелі на тэрыторыі прыватнай мыльнай арцелі пачалося будаўніцтва каніфольнага завода. У эксплуатацыю Навабеліцкі каніфольна-мыльны завод быў запушчаны ў 1929 г. Праз некалькі гадоў на ім была праведзена замена абсталявання і ўкаранёна новая тэхналогія, што дазволіла павялічыць вытворчасць каніфольнага мыла і шкіпінара ў некалькі разоў. У 1934 г. тут працавала больш за 100 чалавек. Пасля ўвядзення ў эксплуатацыю завода “Ізапліт”, Навабеліцкі каніфольна-мыльны завод увайшоў у яго склад (1936). На новаствораным прадпрыемстве з адпрацаваных каніфольных трэсак пачалі выпускаць драўнінна-валакністыя пліты і порыстыя ізапліты для ўцяплення кабін аўтамабіляў. Колькасць работнікаў прадпрыемства складала ўжо больш за 400 чалавек. У гады Вялікай Айчыннай вайны завод знаходзіўся ў эвакуацыі ў Свярдлоўскай вобласці (Расія), выпускаў сінтэтычную камфару для патрэб фронту.

Аднаўленне завода адбылося ў 1946 г. У наступныя гады была значна пашырына вытворчасць: узведзены каніфольна-эксплуатацыйны цэх, асвоены выпуск тэхнічнай святлоадчувальнай паперы, удасканалена тэхналогія. Прадпрыемства было пераўтворана ў Навабеліцкі лесахімічны камбінат (1953), затым у Гомельскі папярова-лесахімічны камбінат (1972). У гэты ж перыяд былі ўстаноўлены дзве механізаваныя лініі замежнай вытворчасці, асвоены выпуск трохслойнай святлоадчувальнай паперы, гафрыраваных шпалераў, шпалераў спосабам высокага друку і інш.

У цяперашні час філіял "Гомельшпалеры" ААТ «Кіруючая кампанія холдынга "Беларускія шпалеры"» выпускае вялікі асартымент прадукцыі: шпалеры (вінілавыя, папяровыя, фоташпалеры, флізелінавыя), металізаваныя матэрыялы на аснове паперы і палімерных плёнак, камбінаваныя плёначныя матэрыялы і інш. Мае таксама вытворчыя магутнасці для выпуску шпалераў па дызайне заказчыка. Яго прадукцыя з’яўляецца пераможцам конкурсаў “Брэнд года”, “Лепшая прадукцыя”, “Лепшы будаўнічы прадукт”. Прадпрыемства ўзнагароджана Прэміяй Урада Рэспублікі Беларусь за дасягненні ў галіне якасці (2000).

Матэрыял падрыхтаваны ў 2024 г.