Першай у Беларусі абласной філармоніяй стала Гомельская (1967 г.). Яе дзейнасць накіравана на развіццё беларускага музычнага мастацтва, прапаганду лепшых дасягненняў айчыннай і сусветнай музычнай культуры. Сярод асноўных напрамкаў – стварэнне творчых калектываў; правядзенне канцэртных праграм, фестываляў, дэкад, конкурсаў з удзелам кампазітараў, балетмайстраў, дырыжораў, рэжысёраў-пастаноўшчыкаў, мастакоў; асветніцкая праца і інш.

Аднымі з першых творчых калектываў установы былі лектарска-камерная група і эстрадныя брыгады. У розныя гады ў філармоніі працавалі вядомыя зараз не толькі ў Беларусі, але і за яе межамі творчыя калектывы і таленавітыя выканаўцы: вакальна-інструментальны ансамбль «Сябры», В. Коўтун, Э. Рознер, А. Градскі, А. Буйноў і інш. Зараз калектыў філармоніі складаецца з камернага аркестра, эстрадна-сімфанічнага аркестра імя Ю. Васілеўскага, камернага хору, групы «Музычна-літаратурны лекторый», народнага ансамбля «Лірыца», групы «Калейдаскоп цудаў», тэатра гульняў і забаў для дзяцей «Вырастайка», салістаў Г. Паўлёнак, А. Фядзяй, А. Гасцінскай, Т. Анціпава, В. Фаміна і інш. Дырэктарам з'яўляецца А. Давыдоўская, мастацкім кіраўніком – А. Сапранкова, народная артыстка Беларусі, лаўрэат прэміі Прэзідэнта Рэспублікі Беларусь «За духоўнае адраджэнне».

Камерны аркестр філармоніі заснаваны ў 2010 г. У 2017 г. яго ўзначаліў А. Глазянкоў. У рэпертуары вельмі цікавыя праграмы («Танцавальная музыка мінулага і сучаснага», «Кожны крыху рамантык», «Танга кахання» і некаторыя іншыя), у якіх музыка злучана з танцам, тэатрам, літаратурай. Эстрадна-сімфанічны аркестр імя Ю. Васілеўскага працуе з 1996 г. У розныя гады з ім супрацоўнічалі народныя артысты Беларусі А. Ярмоленка, М. Скорыкаў, І. Лучанок і інш. Кіраўніком з'яўляецца С. Шныр (з 2007 г.). Калектыў прадстаўляе гледачам лепшыя ўзоры беларускай, рускай, замежнай эстрадна-сімфанічнай музыкі. Камерны хор, заснаваны ў 1979 г., стаў першым прафесіянальным калектывам такога жанру сярод абласных філармоній Беларусі. Зараз мастацкім кіраўніком і галоўным дырыжорам з'яўляецца А. Сакалова. Канцэртныя праграмы ўключаюць шматлікую палітру харавой музыкі, у якую ўваходзяць шэдэўры царкоўна-славянскай духоўнай музыкі, руская і замежная класіка, вакальна-харавыя мініяцюры, творы беларускіх аўтараў, народныя песні і рамансы. Група «Музычна-літаратурны лекторый» створана ў 1967 г. З 2016 г. мастацкім кіраўніком з'яўляецца В. Сівуха, артыст-вакаліст і вядучая калектыву. Рэпертуар разлічаны ў першую чаргу на дзяцей дашкольнага і малодшага школьнага ўзросту. За гады працы групы былі прадстаўлены яркія і цікавыя праграмы, такія як «Зямныя цуды», «Мультканцэрт», «Урокі паводзін з Дашай», «У каралеўстве музыкі» і інш. Часам калектыў радуе сваімі творчымі праектамі і дарослых (праграма «Музыка добрага настрою»). «Лірыца» працуе ў філармоніі з 2004 г. На канцэртах ансамбля гучаць творы розных музычных жанраў і напрамкаў. У 2008 г. «Лірыца» стала арганізатарам конкурсу маладых выканаўцаў на народных інструментах «Залатая ліра Палесся».У гэтым жа годзе ансамбль увайшоў у рэйтынг 10-ці лепшых калектываў свету па выніках галасавання членаў журы на VI Міжнародным конкурсе камерных ансамбляў у г. Асака (Японія). Артысты групы «Калейдаскоп цудаў» стварылі шмат цікавых забаўляльных праграм: «Ілюзіён», «Птушыны двор», «Школа чараўніцтва», «Скарбы вострава паласацікаў» і інш. Ёсць таксама праграма для дарослай аўдыторыі – ілюзіянісцкае шоу з элементамі тэатралізацыі. З 1991 г. групай кіруе М. Манец. Тэатр гульняў і забаў для дзяцей «Вырастайка», створаны ў 1989 г., мэтай сваёй працы лічыць абучэнне дзяцей, створаныя спектаклі дапамагаюць засвойваць школьны матэрыял, вучаць асновам бяспекі і інш. Асаблівае месца ў рэпертуары групы займаюць казкі вядомых рускіх аўтараў.

Сапраўдным гонарам філармоніі з'яўляюцца яе салісты. Канцэртныя праграмы артыста-вакаліста Г. Паўлёнак уключаюць творы розных кампазітараў. Яе голас гучыць у праграмах фестываляў «Беларуская музычная восень», «Мінская вясна», «Музычнае Палессе», міжнароднага фестываля арганнай музыкі «Званы Сафіі» і інш. Мультыінструменталіст А. Фядзяй прадстаўляе ўнікальныя праграмы, дзе можна пачуць вясёлыя частушкі, душэўныя народныя мелодыі, пранікнёныя лірычныя кампазіцыі. Саліст-вакаліст А. Гасцінская разам з таленавітым піяністам Д. Будзяну (Сяргеевым) прадставілі праект, у якім сабрана шмат цікавых і розных праграм: «Калядныя брыльянты джаза», «Зімовая феерыя», «Восеньскае рандэву» і інш. Таленавіты баяніст Т. Анціпаў у 2007 г. працаваў над рэалізацыяй міжнароднага праекта – фестываля майстроў інструментальнай музыкі «Lira-Fest», які кожны год праходзіць у розных гарадах Беларусі і іншых краін. У лістападзе 2017 г. ён стварыў I міжнародны конкурс баяністаў-акардыяністаў «AccoPremium», у жніўні гэтага ж года – I летнюю міжнародную школу майстар-класаў «AccoPremium». Саліст-інструменталіст В. Фамін з'яўляецца аўтарам мноства перакладанняў для фартэпіяна.

Філармонія арганізуе і праводзіць цыклы канцэртаў «Гомельская вясна», «Беларуская музычная восень», «Калядныя музычныя вечары», рэгіянальнае свята мастацтваў «Музычнае Палессе» і інш. Многія выканаўцы ўстановы за перыяд сваёй працы станавіліся лаўрэатамі розных прэмій, уладальнікамі іншых высокіх узнагарод, некаторыя маюць званне народнага артыста Беларусі. Яны шмат гастраліруюць, іх запрашаюць для работы ў складзе прафесіянальнага журы міжнародных конкурсаў.

На жаль, у Гомельскай абласной філармоніі адсутнічае ўласная канцэртная зала. Для вялікіх канцэртаў установа арандуе залы. Класічныя канцэрты праходзяць у Палацы Румянцавых-Паскевічаў, Музеі гісторыі горада Гомеля і Музеі фатаграфіі, канферэнц-залах бібліятэк. Яшчэ адной з пляцовак з'яўляецца Карцінная галерэя Г. Вашчанкі, разам з якой філармонія арганізавала «Арт Муз-праект».

Матэрыял падрыхтаваны ў 2017 г.