Гісторыя рэспубліканскага ўнітарнага прадпрыемства “Белмедпрэпараты” пачалася ў 1929 г. са стварэння на базе невялікай прамысловай вытворчасці ў Мінску Хімфармзавода імя першай пяцігодкі. Выпускаліся тут у тыя часы самыя простыя медыкаменты – экстракты, настойкі, мазі, каплі, вата, бінт, працавала каля 100 чалавек. Паступова ішло пашырэнне вытворчасці: уведзены ў эксплуатацыю цэхі ампульны і гатовых лекавых форм. Многія працэсы былі механізаваны: працавалі таблетачныя і разліўныя машыны, паўаўтаматы для рэзкі і намоткі бінтоў, драбнення лекавых раслін і карэнняў.

У 1945 г. прадпрыемства аднавіла сваю дзейнасць у новых галенавым, мазевым і бінтарэзным цэхах. Пасля атрымання ад ЗША абсталявання для вытворчасці пеніцыліну Хімфармзавод быў пераўтвораны ў Дзяржаўны саюзны завод № 495. Серыйны выпуск першых антыбіётыкаў пеніцыліну (1949) і стрэптаміцыну (1951) дазволіў вырашыць у краіне праблемы лячэння запалення лёгкіх і папярэджвання інфекцый пры хірургічных аперацыях. У далейшым Мінскі дзяржаўны завод медыцынскіх прэпаратаў значна пашырыў выпуск антымікробных прэпаратаў (біяміцыну, тэтрацыкліну, хлортэтрацыкліну), наладзіў выпуск кровазамяняльнікаў, гепарыну, эндакрынных прэпаратаў, лекаў для жывёлагадоўлі і інш. За высокія паказчыкі працы калектыў быў узнагароджаны Ганаровай граматай Вярхоўнага Савета БССР (1979). З 1977 г. прадпрыемства працавала ў складзе Мінскага вытворчага аб’яднання медыцынскіх прэпаратаў “Мінмедпрэпараты”, з 1986 г. – у якасці Беларускага вытворчага аб’яднання медыцынскіх прэпаратаў “Белмедпрэпараты”.

У цяперашні час рэспубліканскае ўнітарнае прадпрыемства “Белмедпрэпараты” ўваходзіць у склад холдынга “Белфармпрам”. У 2010 г. яно было рэарганізавана шляхам далучэння рэспубліканскага ўнітарнага прадпрыемства “Гродзенскі завод медыцынскіх прэпаратаў” і вытворчага прадпрыемства “Завод Ізатрон”. Яго магутнасці цяпер уключаюць 14 вытворчых і 6 дапаможных цэхаў, размешчаных у Мінску, Лідзе і Скідзелі (Гродзенская вобласць). Стварэннем новых лекавых сродкаў і распрацоўкай прагрэсіўных тэхналагічных працэсаў займаецца спецыяльнае структурнае падраздзяленне інавацыйнага развіцця. Працуе на прадпрыемстве больш за 2 тыс. чалавек. РУП “Белмедпрэпараты” ажыццяўляе выпуск шырокага спектра лекавых сродкаў (раствораў для ін’екцый, таблетак, жэлацінавых капсул, парашкоў, гранул, мазяў, крэмаў, геляў) у больш чым 20 фармакатэрапеўтычных групах. У наменклатуры каля 350 найменняў лекавых сродкаў (з якіх 40 арыгінальных і 36 фармацэўтычных субстанцый уласнай генерацыі). На прадпрыемстве ўвесь час працягваецца праца па рэканструкцыі, тэхнічным пераўзбраенні і мадэрнізацыі дзеючых вытворчасцей, аўтаматызацыі і механізацыі тэхналагічных працэсаў.

За высокаэфектыўную арганізацыю работы, выпуск якасных і канкурэнтаздольных лекавых сродкаў РУП “Белмедпрэпараты” ў 2016 г. узнагароджана Ганаровай граматай Савета Міністраў Рэспублікі Беларусь, стала пераможцам конкурсу “Лепшы экспарцёр” (2016) і лаўрэатам агульнарасійскай прэміі “Нацыянальная веліч” (2018).

Матэрыял падрыхтаваны ў 2024 г.