Адным з лідараў мясаперапрацоўчай галіны Беларусі з’яўляецца Бярозаўскі мясакансервавы камбінат.

Будаўніцтва новага прадпрыемства харчовай прамысловасці ў Бярозе (Брэсцкая вобласць) пачалося ў лістападзе 1972 г. Па меры ўзвядзення пачыналі працаваць яго састаўныя часткі: мясатлушчавы, мясаперапрацоўчы і кансервавы цэхі, халадзільнікі. У эксплуатацыю Бярозаўскі мясакамбінат быў уведзены 16 сакавiка 1978 г. Яго магутнасць складалася са 120 т мяса і 15 т каўбасных вырабаў за змену. У далейшым прадпрыемства паступова пашырала сваю вытворчасць, праводзіла пастаянную мадэрнізацыю абсталявання.

У цяперашні час ААТ “Бярозаўскі мясакансервавы камбінат” – найбуйнейшы вытворца кансерваў у Беларусі і ўваходзіць у холдынг “Канцэрн Брэстмясамалпрам”. У яго складзе працуюць мясатлушчавы, каўбасна-кулінарны і кансервавы цэхі, участак хлебабулачных вырабаў, халадзільнік, аб'екты дапаможнага прызначэння і інжынернага забеспячэння, сетка фірменных магазінаў. У 2007 г. да камбіната далучаны вытворчыя пляцоўкі ліквідаванага Баранавіцкага мясакансервавага камбіната. Асартымент прадукцыі складаецца з больш чым 500 найменняў. Прадпрыемства выпускае мяса і субпрадукты (перапрацоўка ялавічыны, свініны, бараніны, каніны), каўбасныя вырабы (каўбасы, сасіскі, сардэлькі, вэнджаніна), мясныя кансервы, паўфабрыкаты з свініны і ялавічыны (фарш, катлеты, пельмені, варэнікі), тлушчы, кармы для жывёл, хлебабулачныя вырабы і інш. Камбінат прымае актыўны ўдзел у выстаўках і кірмашах харчовых тавараў, яго прадукцыя з’яўляецца пераможцам конкурсаў “Народная марка”, “Чэмпіён смаку”, “Лепшая прадукцыя года”, “Выбар года” і інш. Прадпрыемства – лаўрэат Прэміі Урада Рэспублікі Беларусь за дасягненні ў галіне якасці (2005, 2010, 2014, 2017, 2020, 2023).

Матэрыял падрыхтаваны ў 2024 г.