Ландшафтны заказнік рэспубліканскага значэння “Міжазёрны” створаны ў Браслаўскім раёне Віцебскай вобласці ў 1977 г. Мэтай заснавання стала захаванне ўнікальнага ўзгорыста-азёрнага прыроднага комплексу ў Беларускім Паазер’і.

Займаў тэрыторыю плошчай 440 га паміж азёрамі Снуды, Волас Паўночны і Волас Паўднёвы, амаль на 90% пакрытую лесам. У дрэвастоі пераважала хвоя з дамешкам бярозы, дуба і елкі, у падлеску – ядловец, рабіна, ляшчына, у прыбярэжнай паласе азёр і на балотах – трыснягова-асаковыя фітацэнозы. У складзе флоры зарэгістравана больш за 400 відаў сасудзістых раслін, з якіх хвошч стракаты, занесены ў Чырвоную кнігу Рэспублікі Беларусь. У азёрах сустракаліся рэдкія для Беларусі рак шыракапальцы і чатыры рэліктавыя віды ракападобных (лімнакалянус, понтапарэя, бакаплаў Паласа, мізіда).

Заказнік ліквідаваны ў 2007 г. (пастанова Савета Міністраў Рэспублікі Беларусь ад 27.12.2007 г. № 1833). Ахоўная тэрыторыя ўключана ў склад Нацыянальнага парку “Браслаўскія азёры”.

Матэрыял падрыхтаваны ў 2023 г.