“Губернские ведомости” – афіцыйныя газеты, што выдаваліся ў губернях і абласцях Расійскай Імперыі ў 1838–1917 гг. на рускай мове. Іх перыядычнасць мянялася ад 1 да 6 разоў на тыдзень. Газета “Гродненские губернские ведомости” выдавалася ў 1838–1915 гг. і з’яўлялася афіцыйным выданнем Гродзенскага губернскага праўлення.

Газета “Гродненские губернские ведомости” мела два аддзелы – агульны і мясцовы, які, у сваю чаргу, падзяляўся на афіцыйную і неафіцыйную часткі. У агульным аддзеле змяшчаліся толькі афіцыйныя дакументы, якія адносіліся да ўсёй дзяржавы – указы, маніфесты, пастановы і др. У афіцыйнай частцы мясцовага аддзела друкаваліся паведамленні, указы, распараджэнні, аб’явы, цыркуляры і загады, якія адносіліся толькі да Гродзенскай губерні. Неафіцыйная частка адлюстроўвала грамадска-палітычнае і культурнае жыццё, друкавала літаратуразнаўчыя і гісторыка-краязнаўчыя матэрыялы, артыкулы па пытаннях адукацыі і этнаграфіі, сельскай гаспадарцы, інфармавала аб знамянальных падзеях і фактах мясцовага жыцця, а таксама метэаралагічныя зводкі і прыватныя аб’явы. Адметнай асаблівасцю газеты з’яўляецца тое, што на яе старонках зусім не змяшчаліся перадрукоўкі з іншых выданняў.

У 1899 г. афіцыйныя і неафіцыйныя часткі былі аб’яднаны ў адно выданне. У 1903–1906 гг. неафіцыйная частка выходзіла як асобнае выданне. За доўгі перыяд свайго існавання неафіцыйная частка газеты прайшла значную эвалюцыю. Разнастайнымі былі і характар артыкулаў, і асобы, якія друкавалі свае матэрыялы на яе старонках. У газеце выступалі знакамітыя М.А. Дзмітрыеў, А.Я. Багдановіч, М.В. Доўнар-Запольскі, Е.Р. Раманаў, Т. Нарбут і інш.

Для сучасных даследчыкаў і краязнаўцаў газета “Гродненские губернские ведомости” з’яўляецца адным з немалаважных крыніц па гісторыі, эканоміцы і культуры Гродзенскай губерні (сучасная тэрыторыя Гродзенскай і Брэсцкай абласцей).

Матэрыял падрыхтаваны ў 2013 г.