Адным з лідараў лёгкай прамысловасці Беларусі з’яўляецца ААТ "Купалінка" – вытворца бялізнавага і верхняга трыкатажу для дарослых і дзяцей.

Першая прадукцыя – дзіцячыя паўзункі – была атрымана на Салігорскай фабрыцы трыкатажнай бялізны ў красавіку 1969 г. Тады на прадпрыемстве працавала ўсяго 20 швей. З цягам часу ўзводзіліся новыя карпусы, устанаўліваліся сучасныя станкі. Да 1970 г. магутнасць вытворчасці дасягала 15 млн адзінак бялізнавага трыкатажу і больш за 700 т трыкатажнага палатна штогод. Значна пашырыўся асартымент выпускаемай прадукцыі: пачалі шыць мужчынскія і дзіцячыя майкі, мужчынскія гарнітуры, спартыўныя фуфайкі і вырабы са штучнага шоўку. Колькасць работнікаў складала 3 тыс. чалавек. З 1990 г. прадпрыемства дзейнічала як трыкатажны камбінат, з 1992 г. – арэнднае прадпрыемства “Купалінка”, з 1997 г. – сучасная назва.

У цяперашні час адкрытае акцыянернае таварыства “Купалінка” ўваходзіць у склад канцэрна “Беллегпрам”. Тут працуе больш за 1 тыс. чалавек. Штодзень з яго канвеераў сходзяць каля 20 тыс. розных вырабаў і 3 т трыкатажнага палатна. Прадпрыемства выпускае шырокі асартымент адзення з бавоўны, віскозы і іншых натуральных палотнаў для ўсіх узроставых груп з поўным радам размераў, аказвае паслугі па раскроі і пашыве трыкатажных вырабаў. Прамысловая калекцыя складаецца з 1500 мадэлей і выпускаецца пад назвамі “Соня”, “Маленькая лэдзі”, “Інтрыга” і інш. Дзякуючы сучаснаму дызайну, шырокай каляровай гаме і высокім спажывецкім якасцям, прадукцыя прадпрыемства неаднаразова станавілася пераможцам выставак і конкурсаў “Брэнд года”, “Лепшыя тавары Рэспублікі Беларусь”, “Лепшыя тавары Рэспублікі Беларусь на рынку Расійскай Федэрацыі”, “Народная марка Беларусі” і інш. У 2009 г. ААТ “Купалінка” ўзнагароджана Прэміяй Урада Рэспублікі Беларусь за дасягненні ў галіне якасці.

Матэрыял падрыхтаваны ў 2024 г.