Краснаполле – гарадскі пасёлак, цэнтр Краснапольскага раёна Магілёўскай вобласці. Знаходзіцца ў вярхоўі ракі Тур’і (прыток ракі Сянна) на правым беразе ракі Маластоўкі, за 109 км ад Магілёва, 51 км ад чыгуначнай станцыі Камунары на лініі Крычаў – Унеча. Аўтадарогамі злучаны з Чэрыкавам, Касцюковічамі, Чачэрскам, Слаўгарадам.

Узнікненне Краснаполля адносіцца да пачатку XVIII ст. У 1741 г. упамінаецца як слабада ў Прапойскім старостве Рэчыцкага павета Мінскага ваяводства Вялікага Княства Літоўскага, у 1765 г. – як мястэчка Засожскага войтаўства, дзяржаўная ўласнасць. Пасля 1-га падзелу 1772 г. Рэчы Паспалітай далучана да Расійскай імперыі.

У 1774 г. імператрыца Кацярына ІІ падаравала краснапольскія землі князю А.М. Галіцыну. З 1784 г. мястэчка было вядома пад назвай Маластоўка, знаходзілася ў Чэрыкаўскім павеце Магілёўскай губерні і з’яўлялася цэнтрам Краснапольскай воласці. Сучасную назву атрымала ад суседняга маёнтка Краснаполле. У 1785 г. у мястэчку налічвалася 40 двароў, 199 жыхароў, дзейнічала царква, працаваў вінакурны завод. У другой палове XIX ст. Краснаполле з’яўлялася адным з важных гандлёвых месцаў, куды з’язджаліся сяляне з бліжэйшых вёсак і купцы з Масквы, Варшавы, Магілёва, Гомеля, Рыгі, Лібавы з мануфактурай, вырабамі з жалеза, бакалейнымі і іншымі таварамі. У 1864 г. адкрыта народнае вучылішча, дзейнічалі прыватнае аднакласнае вучылішча, царкоўнапрыходская школа, 2 бібліятэкі-чытальні і інш. Паводле перапісу 1897 г. у Краснаполлі пражывала 3248 жыхароў, працавалі 3 гарбарныя і 1 канатнае прадпрыемствы, 7 крупадзёрак, 4 хлебапякарні, царква, 5 малітоўных дамоў, лячэбніца, паштова-тэлеграфнае аддзяленне, 2 хлебазапасныя магазіны, 2 карчмы.

3 сакавіка 1924 г. мястэчка ўвайшло ў склад БССР. 17 ліпеня 1924 г. стала цэнтрам раёна ў Калінінскай, з 9 чэрвеня 1927 да 26 ліпеня 1930 г. – у Магілёўскай акрузе. У 1924 г. пачала дзейнічаць хата-чытальня, створана крэдытнае таварыства, у 1925 г. – пчалаводчы кааператыў, у 1926 г. адкрыта бальніца, працавалі кааператыўная масларобчая арцель, 2 млыны, 2 цагельныя заводы. Некалькі разоў у год праводзіліся кірмашы, на якіх гандлявалі жывёлай, лыкам, вырабамі з дрэва, керамікай, пянькой і інш. У 1928 г. у мястэчку быў арганізаваны калгас, які ў 1932 г. аб’ядноўваў 38 гаспадарак, а крыху пазней створаны другі – “Шлях Леніна”, у склад якога ў 1932 г. уваходзілі 32 гаспадаркі. У эканамічным і арганізацыйным умацаванні калгасаў значную ролю адыграла створаная ў Краснаполлі машынна-трактарная станцыя. У 1937 г. уведзена ў строй невялікая электрастанцыя, працавалі льнозавод, крухмальны завод, абутковая, швейная, кавальская і інвалідная арцелі. 20 лютага 1938 г. мястэчка ўключана ў склад Магілёўскай вобласці, 27 верасня 1938 г. стала гарадскім пасёлкам.

У гады Вялікай Айчыннай вайны 15 жніўня 1941 г. Краснаполле захапілі нямецка-фашысцкія войскі. Ужо ў першыя дні акупацыі ў пасёлку і на тэрыторыі раёна былі арганізаваны і пачалі дзейнічаць патрыятычнае падполле і партызанскія атрады, якія ажыццявілі шэраг буйных баявых аперацый па разгроме нямецкіх гарнізонаў і разбурэнні камунікацый. Краснаполле вызвалена 1 кастрычніка 1943 г. часцямі 3-й арміі Бранскага фронту ў ходзе Бранскай аперацыі.

Адразу пасля вызвалення была адноўлена і пашырана тэлеграфна-тэлефонная сувязь, пачалі ўзнаўляцца старыя і будавацца новыя прадпрыемствы. У 1973, 1982 і 1996 гг. былі распрацаваны генеральныя планы забудовы гарадскога пасёлка. Яго архітэктурна-планіровачная структура ў асноўным прамавугольная, з невялікімі кварталамі, забудаванымі пераважна аднапавярховымі будынкамі сядзібнага тыпу. У цэнтральнай частцы ўзведзены двух- і пяціпавярховыя жылыя дамы.

У 2005 г. Краснаполле атрымала сучасны герб – выява іспанскага шчыта, верхняя частка якога скошана полымяпадобным дзяленнем: правая – зялёная з выявай залатога збана, левая – залатога колеру.

У цяперашні час у Краснаполлі працуюць сярэдняя школа, гімназія, раённая і дзіцячая бібліятэкі, цэнтр дзіцячай творчасці, дзіцячая школа мастацтваў, раённы гісторыка-этнаграфічны музей, бальніца, гасцініца, фізкультурна-аздараўленчы комплекс і інш. Дзейнічаюць прадпрыемствы пераважна харчовай і дрэваапрацоўчай галін прамысловасці, выдаецца раённая газета “Чырвоны сцяг. Краснаполле”.

У пасёлку знаходзяцца брацкія магілы савецкіх воінаў, магіла ахвяр фашызму, Алея Славы, прысвечаная ураджэнцам Краснапольшчыны – Героям Савецкага Саюза і Героям Сацыялістычнай Працы. Устаноўлены помнікі землякам, якія загінулі ў Вялікую Айчынную вайну, воінам-афганцам, помнік вёскам, што спынілі існаванне пасля аварыі на Чарнобыльскай АЭС “Чорная быль Краснапольшчыны” (1996).

Краснаполле – радзіма Герояў Савецкага Саюза І.Ф. Ваксмана і М.М. Антонава, беларускага гісторыка, доктара гістарычных навук І.А. Марзалюка, Я.Д. Зевіна, удзельніка рэвалюцыйнага руху ў Расіі.

Матэрыял падрыхтаваны ў 2025 г.