Гідралагічны заказнік рэспубліканскага значэння “Чарэмшыца” быў створаны ў Мядзельскім раёне Мінскай вобласці ў 1981 г. Мэтай заснавання стала захаванне ў натуральным стане аднайменнага балотнага масіву, які падтрымлівае водны баланс тэрыторыі Нарачанскага прыроднага комплексу.

Плошча заказніка складала 6,2 тыс. га. Размяшчаўся ён на поўначы Нарачанска-Вілейскай нізіны ў міжрэччы Нарачы і Вузлянкі. У раслінным покрыве пераважалі хваёвыя лясы з дамешкам елкі і ядлоўцу. Балота пакрыта хмызнякамі з вольхі, вярбы, бярозы і асакі. Адзначаліся месцы росту рэдкіх для Беларусі бярозы карлікавай і купальніка горнага.

У 2001 г. заказнік ліквідаваны (пастанова Савета Міністраў Рэспублікі Беларусь ад 23.05.2001 г. № 745). Яго тэрыторыя ў якасці каштоўнага прыроднага комплексу ўключана ў склад Нацыянальнага парку “Нарачанскі”.

Матэрыял падрыхтаваны ў 2023 г.