Творчая біяграфія фальклорнага ансамбля пачалася ў 1982 г., калі яго арганізатарам і мастацкім кіраўніком стаў дырэктар Крупіцкага Дома культуры Мінскага раёна Уладзімір Мікалаевіч Гром (1951–2008) (з 2009 г. яго мастацкім кіраўніком з’яўляецца Наталля Лісіца). Пад кіраўніцтвам У.М. Грома ансамбль атрымаў званне “народнага” (1986) і заслужанага аматарскага калектыву Рэспублікі Беларусь (2002), стаў лаўрэатам прэміі Ленінскага камсамола Беларусі (1990). У 2006 г. вялікі ўклад у прапаганду народнай творчасці Беларусі за мяжой і актыўная гастрольна-канцэртная дзейнасць “Крупіцкіх музыкаў” былі адзначаны спецыяльнай прэміяй Прэзідэнта Рэспублікі Беларусь.

Сёння калектыў ансамбля налічвае звыш 30 чалавек розных прафесій: настаўнікі і культработнікі, медыкі і прадпрымальнікі, працаўнікі мясцовых прадпрыемстваў і студэнты. “Крупіцкія музыкі” – гэта 16 музыкантаў, 5 спевакоў і 12 танцораў. Калектыў з’яўляецца творчай лабараторыяй па адраджэнні забытых беларускіх народных музычных інструментаў: нароўні з цымбаламі, гармонікам, скрыпкай і барабанам музыканты ансамбля граюць на басэтлі, колавай ліры, дудзе, акарыне, бразготках … чыгунках, граблях і піле!

У рэпертуары калектыву ёсць апрацоўкі народных песень (“Як я ехаў да яе”, “Кум куму любіў”, “Лянівая жонка”, “Чарнушачка”, “А я бачыў, бачыў”, “На вуліцы мокра”, “Ой, пайду я на ту гару”, “Бычок”), інструментальныя найгрышы (“Крупіцкія музыкі”, “Кросны”), танцы розных рэгіёнаў Беларусі (“Святочны вальс”, “Кадрыль”, “Магдаленка” “Журавель”, “Герань”, полькі: “Палеская”, “Слуцкая”, “Крупіцкая”), харэаграфічныя кампазіцыі (“Пава”, “Базар гудзе”, “Вярба”, “Вечарынка”, “Кавалі”, “Люстэрка”), творы музычнай спадчыны ХVІІІ–ХІХ стст. (А. Абрамовіча, А. і М. Ельскіх, В. Казлоўскага, М. Радзівіла, Ю. Шадурскага), сучасных беларускіх кампазітараў. Дзякуючы заслужанаму работніку культуры Рэспублікі Беларусь балетмайстру Георгію Чорнаму харэаграфічныя пастаноўкі ”Крупіцкіх музыкаў” ператвараюцца ў сапраўдныя спектаклі – у іх прымаюць удзел і танцоры, і спевакі, і салісты-музыканты.

“Крупіцкія музыкі” – удзельнікі Міжнароднага фестывалю фальклорнай музыкі ў Бельгіі (г. Острозэбеке, Бельгія, 1990), Міжнароднага фестывалю фальклору “Жыцень-93”, Дзён беларускай культуры ў Японіі (г. Нагоя, 1995), 1-й Сусветнай фалькларыяды (г. Брунсюм, Нідэрланды, 1996), Міжнароднага фестывалю мастацтваў “Славянскі базар у Віцебску” (2001). Лаўрэат і дыпламант многіх міжнародных фальклорных фестываляў, у тым ліку ў Італіі (г. Сабаўдзія, 1988, Гран-пры; г. Суза, 1993), Сербіі (г. Нові-Сад, 1984), Усебеларускага фестывалю-конкурсу народнага мастацтва “Беларусь – мая песня” (1997–1998, 2006) і іншых. На беларускім радыё ансамблем запісана звыш 100 фанаграм музычных твораў, выпушчана 5 кампакт-дыскаў, пра калектыў зняты кіна- і відэафільмы. Штогод “Крупіцкія музыкі” даюць больш за 50 канцэртаў: праз песні, танцы, музыку яны раскрываюць душу беларускага народа.

Акрамя гастрольнай, калектыў займаецца асветніцкай і дабрачыннай дзейнасцю: артысты пералічвалі грашовыя сродкі на будаўніцтва помніка Кірылу Тураўскаму, куплялі на заробленыя грошы аднаразовыя шпрыцы, дзіцячае харчаванне, інвалідныя каляскі, дапамагалі бальніцам. З дапамогай замежных сяброў з Германіі і Галандыі пабудавалі ў роднай вёсцы новую амбулаторыю.

Сёння “Крупіцкія музыкі” – жаданыя госці на любым свяце.

Матэрыял падрыхтаваны ў 2012 г. Мінскай абласной бібліятэкай ім. А.С. Пушкіна.