Біялагічны заказнік рэспубліканскага значэння “Некасецкі” быў створаны ў Мядзельскім раёне Мінскай вобласці ў 1991 г. Мэтай заснавання стала зберажэнне ў прыродным стане балотна-лугавога ландшафтнага комплексу на поўдні Беларускага Паазер’я.

Плошча ахоўнай тэрыторыі паміж вёскамі Некасецк і Навасёлкі складала 78 га. Рэльеф у выглядзе лагчын з сухадольнымі і нізіннымі лугамі і нізіннымі балотамі. У раслінным складзе пераважалі кусты і драбналессе. Сярод ахоўных відаў флоры сустракалася пярэсна еўрапейская, касач сібірскі, шпажнік чарапіцавы, тайнік яйцападобны, ятрышнік мужчынскі, дрэмлік і інш.

У 2001 г. заказнік ліквідаваны (пастанова Савета Міністраў Рэспублікі Беларусь ад 23.05.2001 г. № 745). Яго тэрыторыя ў якасці каштоўнага прыроднага комплексу ўключана ў склад Нацыянальнага парку “Нарачанскі”.

Матэрыял падрыхтаваны ў 2023 г.