Біялагічны заказнік рэспубліканскага значэння “Селяхі” быў створаны ў Брэсцкім раёне ў 1988 г. Мэтай заснавання стала захаванне натуральных умоў існавання рэдкіх і знікаючых відаў раслін і жывёл у Селяхоўскім возеры і прылеглых да яго прыродных комплексах.

Плошча складала 260 га. Рэльеф пласкахвалісты з грывамі і дзюнамі. У флоры налічвалася 225 відаў сасудзістых раслін. У хваёвых лясах сустракалася рэліктавая паўдрэвападобная папараць – чыставуст каралеўскі, занесены ў Чырвоную кнігу Рэспублікі Беларусь. У час сезонных міграцый на Селяхоўскім возеры адпачывала значная колькасць пералётных вадаплаўных птушак. Усяго ў арнітафаўне зарэгістравана 40 відаў птушак, сярод якіх чорны бусел, малая і шэрашчокая паганкі, малая крачка, шэры саракуш з’яўляюцца рэдкімі для Беларусі.

У 2003 г. заказнік ліквідаваны (пастанова Савета Міністраў Рэспублікі Беларусь ад 30.05.2003 г. № 736). Яго тэрыторыя ўвайшла ў склад ландшафтнага заказніка рэспубліканскага значэння “Прыбугскае Палессе”.

Матэрыял падрыхтаваны ў 2023 г.