Гісторыя адкрытага акцыянернага таварыства «Кіруючая кампанія холдынга "Беларуская гарбарна-абутковая кампанія "Марка"» пачалася ў 1991 г. Менавіта тады прадпрымальнік М. В. Мартынаў разам з групай аднадумцаў заснаваў у Віцебску «Прамыслова-камерцыйную фірму ЛМ+МК». Прадпрыемства займалася аптовым гандлем і вытворчасцю вырабаў са штучнага футра. У далейшым быў арганізаваны выраб мужчынскага, жаночага і дзіцячага абутку з натуральнай скуры, адкрыты фірменныя магазіны, узведзены ўласныя вытворчыя памяшканні. Ужо ў 2003 г. з канвеера прадпрыемства сышла 10-мільённая пара абутку. З часам асартымент прадукцыі пашырыўся новымі тыпамі: унтамі, абуткам для спорту, прагулак, неспрыяльнага надвор’я і інш.

У цяперашні час Беларуская гарбарна-абутковая кампанія «Марка» займае лідзіруючыя пазіцыі ў сваёй галіне. Тут працуе 1,3 тыс. чалавек. Вытворчыя магутнасці складаюць каля 2 млн пар штогод. Прадпрыемства выпускае шырокі асартымент штодзённага, святочнага і элітнага абутку пад брэндамі «Marko», «San Marko», «Bravo», «Marko Boots», «Marko Home» і інш. Высокая якасць прадукцыі неаднаразова адзначалася на шматлікіх нацыянальных і міжнародных выстаўках і конкурсах («Брэнд года», «Выбар года», «Лепшыя тавары Рэспублікі Беларусь», «Лепшыя тавары Рэспублікі Беларусь на рынку Расійскай Федэрацыі», «Народная марка Беларусі» і інш.). У 2007 г. прадпрыемства стала лаўрэатам Прэміі Урада Рэспублікі Беларусь за дасягненні ў галіне якасці.

У мэтах павышэння канкурэнтаздольнасці выпускаемай прадукцыі ў 2013 г. быў створаны холдынг «Беларуская гарбарна-абутковая кампанія "Марка"». У яго склад акрамя самой кампаніі «Марка» ўваходзяць Віцебскі футравы камбінат, прадпрыемствы па вытворчасці абутку «Вердзімар» і «Чырвоны Кастрычнік», па вырабе сумак і скургалантарэі «ВітМа», па рознічным гандлі «Марка-Сэрвіс».

Матэрыял падрыхтаваны ў 2025 г.