Віцебскі мясакамбінат пачаў працаваць у 1924 г. як Залеская гарадская бойня і да 1930 г. з’яўляўся Віцебскім аддзяленнем паевага таварыства “Белмяcа”. Магутнасці прадпрыемства дазвалялі перапрацоўваць мяса забітай жывёлы і забяспечваць мясапрадуктамі жыхароў Віцебска. У гады Вялікай Айчыннай вайны вытворчасць была поўнасцю знішчана. Аднаўленне пачалося ў пасляваенны час. Прадпрыемства паступова адбудавалася і ўжо да канца 1940-х гг. тут перапрацоўвалася да 10 галоў жывёлы за змену. У далейшым ішоў працэс пашырэння вытворчасці. Былі пабудаваны халадзільнік, мясатлушчавы і мясаперапрацоўчы цэхі, што дазволіла вырабляць больш за 7 тыс. каўбас штогод. З 1986 г. камбінат увайшоў у склад вытворчага аб’яднання мяса-малочнай прамысловасці, у 1998 г. рэарганізаваны ў адкрытае акцыянернае таварыства "Віцебскі мясакамбінат".

У цяперашні час прадпрыемства ўваходзіць у Віцебскі канцэрн “Мяса-малочныя прадукты” і мае філіялы “Лепельскі малочна-кансервавы камбінат” і СПФ “Заазер’е”. Вытворчыя магутнасці камбіната складаюць 70 т мяса, 16 т каўбасных вырабаў і 17 т паўфабрыкатаў за змену. Тут вырабляецца больш за 250 відаў прадукцыі пад гандлёвай маркай “МяскоВит”: мяса свініны і ялавічыны, каўбасныя вырабы, сасіскі, сардэлькі, мясныя паўфабрыкаты і інш. Прадпрыемства ўдзельнічае ў рэспубліканскіх і міжнародных выстаўках і конкурсах, з’яўляецца лаўрэатам Прэміі Урада Рэспублікі Беларусь за дасягненні ў галіне якасці (2005, 2010, 2015). Яго прадукцыя прызнана “Лепшым таварам” і “Народнай маркай Беларусі”.

Матэрыял падрыхтаваны ў 2023 г.