ААТ “Гомельбудматэрыялы пачало сваю гісторыю ў 1949 г., калі пастановай ЦК КПб і Савета Міністраў БССР было зацверджана рашэнне аб арганізацыі ў Гомелі камбіната будаўнічых матэрыялаў. Новае прадпрыемства аб’яднала некалькі мясцовых цагляных вытворчасцей, якія дзейнічалі тут раней. У наступныя гады былі ўведзены ў строй ацяпляльна-вытворчая кацельная і завод цеплаізаляцыйных матэрыялаў і лінолеуму (1957), цэх мінералаватных пліт (1966). У 1971 г. камбінат рэарганізаваны ў галаўное прадпрыемства вытворчага аб’яднання “Гомельбудматэрыялы”, куды таксама ўвайшлі Рэчыцкі керамічна-трубны завод і Петрыкаўскі завод па выпуску глінянай цэглы. У 1980–1990 гг. прадпрыемства было рэканструявана і мадэрнізавана, устарэлыя цагляныя заводы закрыты. У 1991 г. вытворчае аб’яднанне пераўтворана ў арэнднае прадпрыемства, у 1996 г. – у адкрытае акцыянернае таварыства (99,9% акцый у дзяржавы).

У цяперашні час ААТ “Гомельбудматэрыялы” – адзін з буйнейшых вытворцаў цеплаізаляцыйных пліт, блокаў з ячэістага бетону, сілікатных камянёў, цэглы і інш. Прадпрыемства з’яўляецца пераможцам конкурсаў “Лепшыя тавары Рэспублікі Беларусь”, “Лепшыя тавары Рэспублікі Беларусь на рынку Расійскай Федэрацыі”, “Лідэр энергаэфектыўнасці”, “На лепшае дасягненне ў будаўнічай галіне Рэспублікі Беларусь”, лаўрэатам Прэміі Урада Рэспублікі Беларусь за дасягненні ў галіне якасці (2002, 2012).

Матэрыял падрыхтаваны ў 2024 г.