Кіруючая кампанія холдынга "Забудова", ААТ

Дата пачатку: 1990 Чысць, п., Маладзечанскі раён, Мінская вобласць

Кароткая даведка: адкрытае акцыянернае таварыства, комплексны домабудаўнічы камбінат, лаўрэат Прэміі Урада Рэспублікі Беларусь за дасягненні ў галіне якасці (2002)

Назвы на іншых мовах: Holding Managing Company «Zabudova» (англійская); Управляющая компания холдинга "Забудова" (руская);

Папярэднія назвы: Завод жалезабетонных вырабаў і буйнапанэльнага домабудавання; Красненьскае вытворчае праектна-будаўнічае аб'яднанне; Чысцянская асацыяцыя па жыллёвым будаўніцтве

Адным з найбуйнейшых прадпрыемстваў будаўнічай індустрыі Беларусі з’яўляецца ААТ «Кіруючая кампанія холдынга “Забудова”».

Сваю гісторыю прадпрыемства вядзе з 1990 г., калі на базе асацыяцыі па жыллёвым будаўніцтве ў пасёлку Чысць (Маладзечанскі раён Мінскай вобласці) было створана акцыянернае таварыства “Забудова”. Першапачаткова яго спецыялізацыяй стала рэалізацыя дзяржаўнай праграмы па ўзвядзенні жылля для ваеннаслужачых. Паступова вытворчасць пашырылася: у эксплуатацыю былі ўведзены заводы сухіх будаўнічых сумесей, дрэваапрацоўчы, будаўнічых матэрыялаў, ячэістага бетону і дахавай чарапіцы, а таксама прадпрыемства па комплексным будаўніцтве.

У цяперашні час Кіруючая кампанія холдынга “Забудова” з'яўляецца адзіным у краіне комплексным домабудаўнічым камбінатам. Тут працуе каля 600 чалавек. У складзе кампаніі дзейнічаюць 4 вытворчасці. На заводзе будаўнічых канструкцый магутнасцю больш за 300 тыс. куб. м вырабаў у год выпускаюць поўныя камплекты будматэрыялаў для дамоў з ячэістага і цяжкага бетону рознай вагі і трываласці (бетонныя блокі для сцен, пліты перакрыццяў, падмуркі, агароджы, кольцы калодзежаў і інш). На дрэваапрацоўчым прадпрыемстве вырабляюць драўляныя аконныя і дзвярныя блокі, дошкі для падлогі, ліштвы, плінтусы, паркет, клеены брус і інш. Завод будаўнічых матэрыялаў вырабляе сухія будаўнічыя сумесі, вапну і гіпс па больш чым 200 рэцэптах. Завод дахавай чарапіцы з’яўляецца вытворцам цэментна-пясчанай чарапіцы, тратуарнай пліткі, элементаў добраўпарадкавання і малых архітэктурных форм. Распрацоўкай праектнай дакументацыі для будаўніцтва займаецца "Забудова-Будкомплекс". Дастаўку гатовай прадукцыі заказчыкам і забеспячэнне заводаў сыравінай вядзе "Забудова-Аўтатранс". Магутнасці прадпрыемства дазваляюць штогод выпускаць поўны камплект вырабаў для будаўніцтва больш за 1 тыс. індывідуальных жылых дамоў.

ААТ «Кіруючая кампанія холдынга “Забудова”» – актыўны ўдзельнік дзяржаўных праграм па будаўніцтве і добраўпарадкаванні населеных пунктаў Беларусі. Прадпрыемства з’яўляецца лаўрэатам Прэміі Урада Рэспублікі Беларусь за дасягненні ў галіне якасці (2002), яго прадукцыя прызнана пераможцам конкурсаў “Лепшая прадукцыя” і “Лепшы будаўнічы прадукт”.

Матэрыял падрыхтаваны ў 2024 г.