Кароткая даведка:
адкрытае акцыянернае таварыства па выпуску тэкстыльнай прадукцыі ў складзе канцэрна "Беллегпрам", лаўрэат Прэміі Урада Рэспублікі Беларусь за дасягненні ў галіне якасці (2003, 2011, 2016), Прэміі Садружнасці Незалежных Дзяржаў за дасягненні ў галіне якасці прадукцыі і паслуг (2017)
Назвы на іншых мовах:
"Mogotex" (англійская); "Моготекс" (руская);
Адным з вядучых вытворцў тэкстыльнай галіны Беларусі з’яўляецца адкрытае акцыянернае таварыства "Магатэкс".
Прадпрыемства пачало працаваць у Магілёве ў 1973 г. як камбінат шаўковых тканін. Адначасова працягвалася будаўніцтва новых вытворчых карпусоў, мантаж і запуск ткацкага і аддзелачнага абсталявання для выхаду на запраектаваную магутнасць у 3 тыс. станкоў. Асноўнай сыравінай для вытворчасці былі ацэтатны шоўк, віскоза, штапельная пража і сінтэтычныя валокны. Часткова яны дастаўляліся з Каўнаса (Літва), часткова вырабляліся на Магілёўскім камбінаце сінтэтычнага валакна імя У. І. Леніна.
У 1980 г. Магілёўскі камбінат шаўковых тканін пераўтвораны ў вытворчае аб’яднанне, у 1989 г. – у арэнднае прадпрыемства, з 1998 – у адкрытае акцыянернае таварыства з сучаснай назвай. З 1990 г. на камбінаце пачалося маштабнае тэхнічнае пераўзбраенне вытворчасці, якое не спыняецца і ў цяперашні час. Зараз ААТ “Магатэкс” складаецца з прадзільнай вытворчасці, ткацкай, швейнай і аддзелачнай фабрык, мае філіялы ў Полацку і Кобрыне, некалькі фірменных магазінаў у Беларусі, уласныя прадстаўніцтвы за межамі краіны. У структуры працуе Цэнтр развіцця асартыменту і інавацыйнай прадукцыі, дзе вядзецца распрацоўка, аптымізацыя і ўкараненне новых структур тканін, трыкатажных палотнаў і нятканых матэрыялаў. Прадпрыемства займаецца перапрацоўкай поліэфірных і віскозных нітак, баваўнянай, поліэфірна-баваўнянай і поліэфірна-віскознай пражы, выпускае шырокі асартымент плашчавых, падкладачных, дэкаратыўных, мэблевых, гардзінных, трыкатажных і тэхнічных палотнаў, спецыяльнае і форменнае адзенне, вырабы дамашняга тэкстылю.
ААТ “Магатэкс” з’яўляцца ўдзельнікам і пераможцам шматлікіх нацыянальных і міжнародных выставак і конкурсаў: “Лепшы экспарцёр” (2013, 2022), “Лепшыя тавары Рэспублікі Беларусь” (2017, 2020, 2021, 2022), “Лепшыя тавары Рэспублікі Беларусь на рынку Расійскай Федэрацыі” (2013) і інш. Прадпрыемства ўзнагароджана Прэміяй Урада Рэспублікі Беларусь за дасягненні ў галіне якасці (2003, 2011, 2016) і Прэміяй Садружнасці Незалежных Дзяржаў за дасягненні ў галіне якасці прадукцыі і паслуг (2017).
