Гісторыя ААТ “Слоніммэбля” пачалася ў 1939 г., калі ў Слоніме (Гродзенская вобласць) на базе гарбарнага завода была арганізавана арцель “Чырвоны сталяр”. Выпускала яна тады мэблю, колы і спружынныя матрацы. Афарбоўка мэблі вялася ўручную, аднак мелася і некалькі механічных станкоў. Працавала тут у даваенны час каля 50 чалавек. У гады Вялікай Айчыннай вайны арцель дзейнічала на патрэбы акупацыйнай улады і выпускала мэблю для бальніц і дарожныя паказальнікі.

Пасля вызвалення горада прадпрыемства аднавіла працу. Паступова былі набыты паравая машына, кацёл, фрэзер, вінтавы прэс, пабудаваны новыя цэхі і сушыльныя камеры, што павысіла аб’ём і якасць прадукцыі. Сярод выпускаемых тавараў – шафы, сталы, крэслы, табурэты і інш. У 1956 г. арцель перайменавана ў Слонімскую мэблевую фабрыку, да яе далучаны 1-ы лесазавод імя Кірава, які з’яўляўся шматгадовым пастаўшчыком сыравіны. У 1971–1997 гг. фабрыка ўваходзіла ў склад буйнога дрэваперапрацоўчага аб’яднання “Мастоўдрэў”. З 1979 г. прадпрыемства стала выкарыстоўваць сучасную назву. У гэты перыяд на ёй працавала каля 700 чалавек.

У цяперашні час адкрытае акцыянернае таварыства “Слоніммэбля” ўваходзіць у склад канцэрна “Беллеспаперапрам” і з’яўляецца адным з вядучых вытворцаў мэблі ў Рэспубліцы Беларусь. У пачатку 2000-х гг. на прадпрыемстве была праведзена карэнная мадэрнізацыя: закуплена каля 50 адзінак сучаснага абсталявання, асвоены новыя тэхналогіі. Зараз фабрыка спецыялізуецца на выпуску спальных гарнітураў, корпуснай мэблі і кухань. Штомесяц з канвеераў сыходзіць каля 2 тыс. камплектаў мэблі. Яе прадукцыя з’яўляецца пастаянным удзельнікам і пераможцам шматлікіх выставак і конкурсаў: “Лепшыя тавары Рэспублікі Беларусь”, “Лепшыя тавары Рэспублікі Беларусь на рынку Расійскай Федэрацыі”, “Лепшы прадпрымальнік Гродзенскай вобласці” і інш. Прадпрыемства ўзнагароджана Прэміяй Урада Рэспублікі Беларусь за дасягненні ў галіне якасці (2004, 2012, 2017).

Матэрыял падрыхтаваны ў 2024 г.