У цэнтры г. Высокае Камянецкага раёна Брэсцкай вобласці ўзвышаецца белы каменны Храм ў гонар Уздзвіжання Крыжа Гасподняга.

Узведзены ён быў на месцы папярэдняй драўлянай царквы ў 1869 г. Праект ў рэтраспектыўна-рускім стылі з элементамі старажытнарускага дойлідства быў распрацаваны расійскім акадэмікам архітэктуры М. М. Чагіным. Ён жа выканаў і іканастас храма. Фінансаванне будаўніцтва ажыццяўлялася за кошт прыхаджан і сродкаў, канфіскаваных дзяржавай пасля паўстання 1863–1864 гг.

У аснове будынка з цэглы кубападобны цэнтрычны аб’ём з паўкруглай апсідай, накрыты шатровым дахам з пяццю купаламі. Да храма па баках далучаны прамавугольныя прыдзелы і прытвор з надбудаванай шатровай званіцай і шасцю званамі. На фасадах – арачныя аконныя праёмы ў ліштвах, раскрапаваныя лапаткамі і прафіляванымі карнізамі. Уваход аформлены ў выглядзе прамавугольнага праёма з круглай люкарнай над ім. Унутры храма змешчаны двух’ярусны іканастас з абразамі XIV–XІХ стст. Лічыцца, што адзін з іх быў падараваны храму расійскім імператарам Аляксандрам ІІІ. Усталявана таксама мемарыяльная дошка ў гонар наведвання царквы імператарскай сям’ёй у 1886 г.

У цяперашні час будынак Высокаўскай Крыжаўзвіжанскай царквы адрэстаўраваны і знаходзіцца ў добрым стане. Ён унесены ў Дзяржаўны спіс гісторыка-культурных каштоўнасцей Рэспублікі Беларусь і ахоўваецца дзяржавай.

Матэрыял падрыхтаваны ў 2022 г.