Значную частку свайго жыцця таленавіты літаратар, вядомы мецэнат і паспяховы прадпрымальнік Анатоль Васільевіч Статкевіч-Чабаганаў (сапраўднае прозвішча Чабаганаў) прысвяціў справе захавання беларускай культуры і вяртанню забытых імёнаў.

Нарадзіўся ён у в. Засмужжа Любанскага раёна Мінскай вобласці. Пасля заканчэння школы вучыўся ў Ленінградскім інстытуце дакладнай механікі і оптыкі. Атрымаўшы дыплом па спецыяльнасцях «Электронныя вылічальныя машыны» і «Сістэмы кіравання балістычнымі ракетамі падводных лодак», працаваў інжынерам-электроншчыкам у абароннай прамысловасці. Удасканальваў адукацыю ў Вышэйшай школе кіравання пры Аграпрамысловым камітэце СССР (Масква) і Школе сусветнай эканомікі і англійскай мовы (г. Борнмут, Вялікабрытанія). Быў начальнікам Глаўка Дзяржаграпрама БССР, старшынёй праўлення Беларускай аграпрамысловай біржы. З цягам часу арганізаваў сваю справу, з’яўляўся старшынёй назіральнага савета групы кампаній «Статкевіч» – аднаго з буйнейшых у СНД холдынгаў па вытворчасці і рэалізацыі спецадзення.

Гісторыяй сваёй сям’і А.В. Статкевіч-Чабаганаў пачаў цікавіцца яшчэ ў маладыя гады. З інтарэсам прыслухоўваўся да размоў старэйшых родзічаў, запамінаў цікавыя факты. У пачатку 1990-х гг. заняўся мэтанакіраванай працай па даследаванні свайго радаводу – апытваў сваякоў, адшукваў і ўпарадкоўваў старажытныя сямейныя пахаванні. У далейшым звярнуўся за інфармацыяй у архівы, бібліятэкі і навуковыя інстытуты. Накіроўваў запыты біяграфічнага характару ва ўстановы не толькі Беларусі, але і Расіі, Літвы, Польшчы, Украіны. Паступова кола яго пошукаў пашыралася, ахоплівала ўсё новыя і новыя прозвішчы, больш даўнія часы і з цягам часу перарасло ў сапраўднае вывучэнне гісторыі беларускага краю. За больш чым два дзесяцігоддзі навукова-пошукавай работы ў даследчыка накапілася вялікая колькасць звестак, якія ён апрацаваў і сістэматызаваў у некалькіх грунтоўных тамах пад агульнай назвай «Я – сын Ваш» (2011–2017). У кнігах змешчана кароткае апісанне і радавод звыш 40 шляхецкіх родаў, цікавыя факты і займальныя сюжэты з жыцця іх асобных прадстаўнікоў, фотаздымкі і гістарычныя дакументы за апошнія пяць стагоддзяў. У асобным томе выкладзена гісторыя в. Засмужжа. Матэрыялы, сабраныя А.В. Статкевічам-Чабаганавым у перакладзе на беларускую мову, былі таксама надрукаваны ў часопісе «Роднае слова». У 2012 г. за ўклад у вывучэнне і прапаганду духоўнай і культурнай спадчыны, стварэнне серыі гісторыка-дакументальных кніг «Я – сын Ваш», прысвечаных дваранскім родам Беларусі, пісьменніку прысуджана спецыяльная прэмія Прэзідэнта Рэспублікі Беларусь.

Акрамя даследчыцкай працы А.В. Статкевіч-Чабаганаў шмат займаўся мецэнацтвам. Дзякуючы яго намаганням былі адноўлены і пабудаваны праваслаўныя храмы Космы і Дамініана ў в. Вішнева (Валожынскі раён), Узнясення Гасподня ў в. Сёмкава і Нараджэння Найсвяцейшай Багародзіцы ў в. Сёмкаў Гарадок (Мінскі раён). У Слуцку і Мінску ўстаноўлены помнікі святой Сафіі, княгіні Слуцкай.

Актыўная творчая і грамадская дзейнасць А.В. Статкевіча-Чабаганава была высока ацэнена. Ён стаў лаўрэатам Рэспубліканскага конкурсу на лепшы літаратурны твор года «Залаты Купідон» за першы том свайго даследавання «Я – сын Ваш» (2011), быў узнагароджаны міжнароднай грамадска-літаратурнай прэміяй Саюза пісьменнікаў Расіі, Акадэміі навук Расіі і Інстытута сусветнай літаратуры «”Золотая осень” имени С.А. Есенина» (2013), стаў уладальнікам знака Міністэрства культуры Рэспублікі Беларусь «За ўклад у развіццё культуры Беларусі». Анатоль Васільевіч узнагароджаны Рускай Праваслаўнай Царквой ордэнам «Святога роўнаапостальнага князя Уладзіміра ІІІ ступені», Беларускай Праваслаўнай Царквой ордэнамі «Святой праведнай княгіні Сафіі Слуцкай», «Свяціцеля Кірылы Тураўскага І ступені» і «Крыжа прападобнай Еўфрасінні Полацкай», Праваслаўнай Царквой Чэшскіх зямель і Славакіі «Залатым медалём святых роўнаапостальных Кірылы і Мяфодзія».

Матэрыял падрыхтаваны ў 2021 г.