Малочны завод у Ляхавічах (Брэсцкая вобласць) пачаў працаваць у жніўні 1945 г. у якасці структурнага падраздзялення Ляхавіцкага раймаслапрама Баранавіцкага абласнога маслатрэста. Спачатку тут перапрацоўвалі ўсяго 600 л малака за суткі, з якога рабілі сыр, масла, вяршкі і тварог. У 1951 г. прадпрыемства пашырыла вытворчыя магутнасці да 70 т малака за суткі і было перайменавана ў Ляхавіцкае сепаратарнае аддзяленне Баранавіцкага малочнага завода. Як самастойнае прадпрыемства яно пачало функцыянаваць у 1988 г., у 1995 г. было акцыянавана і атрымала назву Ляхавіцкі малочны завод.

У цяперашні час сумеснае адкрытае акцыянернае таварыства “Ляхавіцкі малочны завод” уваходзіць у склад холдынга “Канцэрн Брэстмясамалпрам”. На ім працуе больш за 200 чалавек. Завод уяўляе сабой сучаснае аўтаматызаване прадпрыемства, максімальная магутнасць якога па перапрацоўцы малака дасягае 250 т за суткі. На прадпрыемстве вядзецца пастаянная рэканструкцыя і мадэрнізацыя вытворчасці. У апошнія гады былі абноўлены цэхі па выпуску цэльнамалочнай прадукцыі, масла і тварожных вырабаў, пачаў працу цэх па выпуску харчовага казеіну, уведзена ў эксплуатацыю абсталяванне нанафільтрацыі і зваротнага осмасу, здзейснены пераход на безадкідную тэхналогію перапрацоўкі сыравіны. На заводзе ажыццяўляецца выпуск больш за 50 найменняў малочнай прадукцыі пад гандлёвай маркай “Ляхавічок”: малака, вяршкоў, кефіра, масла, смятаны, тварагу, тварожных дэсертаў, ёгуртаў, безлактозных прадуктаў. Прадукцыя прадпрыемства станавілася неаднаразовым пераможцам конкурсаў “Лепшая прадукцыя года”, “Лепшыя тавары Беларусі”, “Лепшы смак”. Ляхавіцкі малочны завод з’яўляецца лаўрэатам Прэміі Урада Рэспублікі Беларусь за дасягненні ў галіне якасці (2011, 2016).

Матэрыял падрыхтаваны ў 2024 г.