Адным з помнікаў драўлянага дойлідства Міншчыны, унесеным у Дзяржаўны спіс гісторыка-культурных каштоўнасцей Рэспублікі Беларусь, з’яўляецца храм Святой Жываначальнай Троіцы, размешчаны ў аграгарадку Княгінін Мядзельскага раёна Мінскай вобласці.

Згодна з гістарычнымі крыніцамі, царква была пабудавана каля 1772 г. на месцы згарэўшага ўніяцкага храма, які стаяў тут з 1713 г. Драўляны будынак добра захаваўся і ніколі не быў пашкоджаны. Ён складаецца з квадратнай асноўнай часткі і прымыкаючых да яе бабінца з двух’яруснай шатровай званіцай і апсіды з рызніцай. Дахі званіцы і рызніцы ўпрыгожаны цыбулепадобнымі макаўкамі. Бутавая агароджа з арачнай брамай акружае царкоўны падворак.

Вядома, што царкву аднойчы наведваў імператар Расійскай імперыі Мікалай ІІ. Ён падараваў ёй абразы Святога благавернага князя Аляксандра Неўскага і Прасвятой Багародзіцы, якія захаваліся да цяперашняга часу. Ёсць у храме і абраз Уладзімірскай Божай Маці, якую ў 1915 г. перадалі прыходу з воінскай часці г. Троіцка Арэнбургскай губерні.

У 2010–2012 гг. пад кіраўніцтвам настаяцеля Канстанціна Яроміча ў царкве праведзены капітальны рамонт: устаноўлены новыя вокны і дзверы, заменены дах і купалы, адноўлены фасад, прыведзены ў належны стан іканастас і абразы. Пасля рэстаўрацыі храм быў урачыста асвечаны 29 верасня 2012 г.

Матэрыял падрыхтаваны ў 2021 г.