Леўчанка Мікалай Уладзіміравіч

Дата нараджэння: 01.01.1954 Калодзецкая, в., Касцюковіцкі раён, Магілёўская вобласць

Кароткая даведка: пісьменнік, журналіст, выдатнік друку Беларусі, заслужаны журналіст Беларусі, ганаровы грамадзянін Быхаўскага раёна

Імёны на іншых мовах: Левченко Николай Владимирович (руская);

Імя Мікалая Уладзіміравіча Леўчанкі невыпадкова занесена ў абласную краязнаўчую базу данных “Славутыя землякі Касцюкоўшчыны”. Ён – выдатнік друку Беларусі (2003), заслужаны журналіст Беларускага Саюза журналістаў (2005), член Саюза пісьменнікаў Беларусі (2006).

Нарадзіўся М. Леўчанка ў в. Калодзецкая Касцюковіцкага раёна Магілёўскай вобласці ў сялянскай сям’і. Пасля заканчэння сярэдняй школы служыў у арміі ў Групе савецкіх войск у Германіі. У 1981 г. скончыў факультэт журналістыкі Беларускага дзяржаўнага ўніверсітэта імя У.І. Леніна, у 1985 г. Мінскую вышэйшую партыйную школу. З 1974 г. працуе ў сродках масавай інфармацыі: карэспандэнт, загадчык аддзела, намеснік галоўнага рэдактара, з лютага 1999 г. галоўны рэдактар газеты “Маяк Прыдняпроўя”.

Першыя вершы М.У. Леўчанкі пачалі з’яўляцца ў друку спачатку ў раённай газеце, потым у абласных і рэспубліканскіх перыядычных выданнях, у зборніку “Галасы Прыдняпроўя”. Аднак перавагу ён аддаваў журналісцкай працы і толькі да свайго 50-годдзя выдаў кніжку апавяданняў “Пад знакам зялёнай ружы”, потым быў надрукаваны зборнік вершаў “Шчырасць”. Наступныя чатыры кнігі (“Зеленое золото”, “Уроки мужества”, “Непраходзячы боль”, “Крылатая гвардия”) напісаў пад уражаннем творчасці земляка, вайсковага журналіста і вядомага пісьменніка В. Ткачова. У 2013 г. была надрукавана яшчэ адна кніга У. Леўчанкі “Вяртанне”, якую склалі вершы пра малую Радзіму, гумарэскі, літаратурна-крытычныя артыкулы, прысвечаныя творчасці вядомых пісьменнікаў Магілёўшчыны, а таксама ўспаміны пра дзяцінства, край маленства, блізкіх і дарагіх аўтару людзей.

Мікалай Уладзіміравіч Леўчанка з’яўляецца лаўрэатам спецыяльнай прэміі Магілёўскага аблвыканкама “Чалавек года” (2005) у намінацыі грамадска-палітычная дзейнасць, лаўрэатам прэміі Беларускага Саюза журналістаў “Золотое перо”, уладальнікам Гран-пры VI Нацыянальнага конкурсу друкаваных сродкаў масавай інфармацыі “Золотая литера” у намінацыі “Лепшы творчы праект рэгіянальных, шматтыражных СМІ”, першым лаўрэатам літаратурнай прэміі імя Алеся Пісьмянкова за дасягненні ў літаратуры (заснавана ў 2012 г.). У 2014 г. абраны дэпутатам Быхаўскага раённага Савета дэпутатаў ад Гарадзецкай выбарчай (акругі).

Матэрыял падрыхтаваны ў 2014 г. УК "Магілёўская абласная бібліятэка імя У. І. Леніна".