Асноўнай славутасцю в. Малыя Жухавічы Карэліцкага раёна Гродзенскай вобласці з’яўляецца драўляная Царква Іаана Хрысціцеля.

Вядома, што яна пабудавана на сродкі мясцовага землеўладальніка Нісіслаўскага ў 1783 г. Першапачаткава гэта была невялікая прамавугольная зрубная пабудова з апсідай, накрытая чатырохсхільным дахам. У другой палове XIX ст. у царкве праведзена перабудова: над галоўным фасадам узвялі чатырохгранную шатровую званіцу з макаўкай на гранёным барабане, заклалі новы падмурак (1876). Сцены храма гарызантальна ашаляваны, прарэзаны вузкімі прамавугольнымі аконнымі праёмамі ў фігурных ліштвах. Фасады ўпрыгожаны арнаментальным фрызам. Унутры храма над уваходам размешчаны невысокія хоры на двух драўляных слупах, апсіда вылучана драўляным іканастасам. У 1882 г. побач з царквой узведзена драўляная царкоўнапрыходская школа. У наступныя гады храм у вёсцы Малыя Жухавічы ўжо больш істотна не перабудоўваўся, а толькі рамантаваўся па меры неабходнасці. Царква без разбурэнняў перажыла ваенныя перыяды ХХ ст., у 1961 г. была закрыта.

У 1989 г. Малажухавіцкую царкву Іаана Хрысціцеля вярнулі вернікам і адрамантавалі. Цяпер яна знаходзіцца ў добрым стане і працягвае дзейнічаць.

Матэрыял падрыхтаваны ў 2022 г.