Будучая алімпійская чэмпіёнка нарадзілася ў 1992 годзе ў Мінску. У дзяцінстве Ганна хадзіла ў секцыю па гімнастыцы, але ва ўзросце 7 год бацькі аддалі яе ў фрыстайл. Дзяўчынка трапіла да вядомага трэнера Уладзіміра Дашчынскага, бацькі алімпійскага прызёра зімовых Гульняў у Нагана–1998 і Турыне–2006 Дзмітрыя Дашчынскага. Другім трэнерам Ганны Гуськовай стаў Юрый Купрацэвіч, які давёў яе да скачкоў на лыжах. Хутка былі атрыманы першыя медалі на юніёрскім узроўні.

У 2005 годзе Ганна трапіла ў дарослую каманду зборнай Беларусі па фрыстайле і дэбютавала на міжнароднай арэне на адкрытым чэмпіянаце Расіі.

З 2006 года актыўна выступала ў Кубку Еўропы, які выйграла ў заліку акрабатыкі ў сезоне 2008/09. У 2009 годзе спартсменка таксама дэбютавала ў Кубку Свету на этапе ў Маскве, дзе стала 24-й. На чэмпіянаце свету ў тым жа годзе Ганна заняла 14 месца. Праз два гады ў 2011 годзе на сусветным першынстве ў Дзір-Вэллі фрыстайлістка ўзнялася на 5 пазіцыю. У 2012 годзе Ганна заваявала «серабро» на чэмпіянаце свету сярод юніёраў у Італіі.

На зімовых Алімпійскіх гульнях Ганна Гуськова дэбютавала ў 2014 годзе ў Сочы. Тады Міжнародная федэрацыя лыжнага спорту выдзяліла Беларусі 2 дадатковыя жаночыя ліцэнзіі, аднак Ганна няўдала выступіла ў кваліфікацыйных спробах, заняўшы выніковае 21 месца.

31 студзеня 2015 года ў амерыканскім Лэйк-Плэсідзе Ганна ўпершыню трапіла на подыум этапа Кубка свету, заняўшы 3 месца.

Спартсменка двойчы перанесла цяжкія траўмы (пашкоджанне меніска і разрыў пярэдняй крыжападобнай звязкі), пасля адной з аперацый ёй у калена ўставілі тытанавы шруб. З-за траўмаў Ганна практычна цалкам прапусціла сезон Кубка свету 2016/17.

На першым этапе алімпійскага сезона 2017/18 Ганна Гуськова заваявала першую перамогу на этапе Кубка свету ў Кітаі, а па выніках сезона заняла другое месца ў заліку акрабатыкі, саступіўшы толькі кітаянцы Сю Ментао.

На Алімпіядзе ў Пхенчхане–2018 Ганна прабілася ў асноўны фінал пасля першай кваліфікацыйнай спробы, а ў суперфінале прадэманстравала скачок, які прынёс ёй адзнаку 96,14 балаў і залаты алімпійскі медаль. Спартсменка з’яўляецца заслужаным майстарам спорту Беларусі, у 2018 г. узнагароджана ордэнам Айчыны ІІІ ступені.

У адным з інтэрв’ю пасля трыумфальнага выступлення на Алімпіядзе Ганна сказала, што пераможны скачок прысвяціла свайму бацьку. Акрамя фрыстайла дзяўчына захапляецца пашывам адзення, любіць татуіроўкі. У дзяцінстве марыла стаць журналістам, фатографам або актрысай.

Даведка падрыхтавана на аснове матэрыялаў сайта Нацыянальнага алімпійскага камітэта Рэспублікі Беларусь у 2019 г.