Аграгарадок Баравіца – цэнтр Баравіцкага сельскага Савета (Кіраўскі раён Магілёўскай вобласці) – размешчаны за 10 км ад раённага цэнтра Кіраўск. У сярэдзіне XVIII ст. на месцы Баравіцы быў сасновы бор. У 1848 г. па праекту інжынера М. Ястрабскага пачалося будаўніцтва аўтамабільнай дарогі Магілёў – Бабруйск. Праз некаторы час з’явілася першае пасяленне – Баравіца. Яно паступова расло і развівалася. На баравіцкай зямлі жылі працавітыя людзі, якія займаліся земляробствам, ткацтвам, бондарствам, кавальскай справай, пляценнем з лазы, здабывалі смалу і пяньку. Згодна з перапісам 1897 г. у Баравіцы налічвалася 9 двароў і 67 жыхароў. Яна ўваходзіла ў склад Качэрыцкай воласці Бабруйскага павета Мінскай губерні. З 1907 г. у вёсцы пражывала 108 жыхароў, было 17 двароў. У 1911 г. у Баравіцы была адкрыта школа граматы, якая ў 1913 г. ператварылася ў земскую. Пасля Кастрычніцкай рэвалюцыі 1917 г. вёска працягвала развівацца. У 1924 г. яна стала цэнтрам сельсавета. У 1929 г. быў арганізаваны калгас «Свет». У гады Вялікай Айчыннай вайны Баравіцу акупіравалі нямецка-фашысцкія захопнікі. На франтах і ў партызанах загінулі 36 жыхароў Баравіцы, якім у аграгарадку ўзведзены помнік.

Пасля вайны вёска была адноўлена. У 1946 г. да яе далучылася в. Кармчышча. У 1956 г. быў арганізаваны калгас імя Будзённага, у 1958 г. – «Радзіма», які праз 2 гады рэарганізавалі ў саўгас «Бераснёўскі», у 1995 г. меў статус сельгаскааператыва (СВК). З 2005 г. «Бераснёўскі» з’яўляецца філіялам ААТ «Бабруйскаграмаш». Дзякуючы актыўнаму будаўніцтву і развіццю інфраструктуры ў 2007 г. Баравіца набыла статус аграгарадка. У 2019 г. там налічвалася 229 гаспадарак, 591 жыхар. Сацыяльная структура аграгарадка прадстаўлена наступнымі аб’ектамі: сярэдняя школа, Дом культуры, бібліятэка, фельчарска-акушэрскі пункт, комплексна-прыёмны пункт, 2 магазіны, сталовая, аддзяленне паштовай сувязі і ашчаднага банка, АТС і інш.

Матэрыял падрыхтаваны ў 2021 г. на аснове інфармацыі, змешчанай на сайце Кіраўскага райвыканкама.