Канстанцін Адамавіч Шастак нарадзіўся ў вёсцы Янавічы Нясвіжскага павета Навагрудскага ваяводства Польскай Рэспублікі (цяпер аграгарадок Янавічы Клецкага раёна Мінскай вобласці) у сялянскай сям’і.

У гады Вялікай Айчыннай вайны малалетнім дзіцём перажыў акупацыю. У 1952 г. пачаў працоўную дзейнасць паляводам калгаса «Памяць Леніна». Пасля тэрміновай службы ў войску вярнуўся на працу ў калгас і ў 1960 г. узначаліў свінагадоўчую ферму. За поспехі ў развіцці свінагадоўлі быў узнагароджаны ордэнам «Знак Пашаны». У 1974 г. скончыў Беларускі завочны сельскагаспадарчы тэхнікум у гарадскім пасёлку Смілавічы Чэрвеньскага раёна Мінскай вобласці.

У 1976 г. К.А. Шастак узначаліў малочнатаварную ферму племзавода «Чырвоная Зорка». За поспехі, дасягнутыя ў выкананні заданняў і сацыялістычных абавязацельстваў па павелічэнні вытворчасці і продажу дзяржаве прадуктаў жывёлагадоўлі, Канстанцін Адамавіч быў узнагароджаны ордэнам Працоўнага Чырвонага Сцяга. У 1985 г. стаў брыгадзірам, ажыццяўляў кантроль над рацыянальным выкарыстаннем кармоў і своечасовым кармленнем жывёлы, вёў работу па павышэнні прадукцыйнасці дойнага статка. Калектыў пад кіраўніцтвам Канстанціна Адамавіча неаднаразова перамагаў у раённых і абласных сацыялістычных спаборніцтвах.

У 1988 г. за выдатныя вынікі, дасягнутыя ў павелічэнні вытворчасці сельскагаспадарчай прадукцыі на аснове асваення інтэнсіўных тэхналогій і перадавых метадаў арганізацыі працы ў земляробстве і жывёлагадоўлі, і праяўленую працоўную доблесць Канстанціну Адамавічу Шастаку было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Канстанцін Адамавіч працаваў на племзаводзе «Чырвоная зорка» (цяпер камунальнае сельскагаспадарчае ўнітарнае прадпрыемства «Племянны завод «Чырвоная зорка») да выхаду на заслужаны адпачынак у 1996 г. Прымаў актыўны ўдзел у грамадскім жыцці гаспадаркі, мастацкай самадзейнасці. Узнагароджаны ордэнамі Леніна (1988), Працоўнага Чырвонага Сцяга (1981), «Знак Пашаны» (1966), медалямі.

Пераклад 2021 г. матэрыялаў інтэрнэт-праекта «Герои страны».