Мікалай Яфрэмавіч Шарснёў нарадзіўся ў вёсцы Прыгузкі Аршанскага раёна Віцебскай вобласці ў сялянскай сям’і. Атрымаў пачатковую адукацыю ў мясцовай школе. У гады Вялікай Айчыннай вайны дзіцём перажыў акупацыю.

Пасля вызвалення раёна ў 1944 г. прымаў удзел у аднаўленні мясцовага калгаса (у 1950 г. далучаны да калгаса імя Куйбышава). У далейшым працаваў у гаспадарцы, праявіў здольнасці да сельскагаспадарчай тэхнікі. Пасля навучання на курсах трактарыстаў вярнуўся ў родную гаспадарку і працягнуў працаваць у ёй прычэпшчыкам.

У 1950–1953 гг. праходзіў тэрміновую службу ў Савецкай Арміі і набыў спецыяльнасць вадзіцеля аўтамабіля. Пасля звальнення ў запас быў шафёрам у Оршы. Пазней вярнуўся ў родную вёску і працягнуў працаваць трактарыстам ва ўзбуйненым калгасе імя Куйбышава. Пасля заканчэння сёмай пашыранай пяцігодкі (1959–1965) М.Я. Шарснёў быў прызначаны звеннявым. З цягам часу атрымаў сярэднюю адукацыю. У 1970-х гг. у складзе дэлегацыі савецкіх калгаснікаў наведаў з візітам дружбы Германскую Дэмакратычную Рэспубліку.

Дзякуючы выкананню правіл агратэхнікі, высокапрадукцыйнаму выкарыстанню машын і выразнай арганізацыі працы М.Я. Шарснёў хутка выйшаў у лік перадавых бульбаводаў Віцебскай вобласці. Мікалай Яфрэмавіч першым пачаў вырошчваць бульбу найноўшых гатункаў «Тэмп», «Лошыцкі», «Агеньчык», стаў прымяняць новую тэхналогію пасадкі клубняў. У 1971 г. за поспехі, дасягнутыя ў развіцці сельскагаспадарчай вытворчасці і выкананні пяцігадовага плана продажу дзяржаве прадуктаў земляробства і жывёлагадоўлі, Мікалай Яфрэмавіч Шарснёў быў узнагароджаны ордэнам Леніна.

Асабліва ўдалым стаў для перадавога бульбавода 1973 г. За вялікія поспехі, дасягнутыя ва Усесаюзным сацыялістычным спаборніцтве, праяўленую працоўную доблесць у выкананні прынятых абавязацельстваў па павелічэнні вытворчасці і продажу дзяржаве збожжа, бульбы, цукровых буракоў і іншых прадуктаў земляробства ў 1973 г. Мікалаю Яфрэмавічу Шарснёву было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

За дасягнутыя поспехі ў барацьбе за датэрміновае выкананне народнагаспадарчага плана 1973 г. імя Мікалая Шарснёва было занесена на абласную Дошку гонару, яму аднаму з першых у гаспадарцы было прысвоена званне «Ударнік камуністычнай працы».

Мікалай Яфрэмавіч Шарснёў некалькі разоў прымаў удзел у працы Выстаўкі дасягненняў народнай гаспадаркі СССР (ВДНГ СССР), быў узнагароджаны медалямі і дыпломамі выставачнага камітэта.

Да выхаду на заслужаны адпачынак Мікалай Шарснёў працаваў у калгасе: быў трактарыстам, майстрам-наладчыкам, праявіў сябе як вынаходнік і рацыяналізатар. Шмат часу аддаваў грамадскай працы: з’яўляўся дэпутатам Віцебскага абласнога савета дэпутатаў працоўных, быў членам Цэнтральнай выбарчай камісіі па выбарах у Вярхоўны Савет БССР (1975–1980), членам Пастаяннай камісіі па прамысловасці Савета Саюза Вярхоўнага Савета СССР (1979–1984), дэлегатам XXV з’езда КПСС (1976). Узнагароджаны ордэнамі Леніна (1971, 1973), медалямі.

У 2013 г. на будынку адміністрацыі Барздоўскага сельсавета усталяваная мемарыяльная дошка у гонар М.Я. Шарснёва.

Пераклад 2021 г. матэрыялаў інтэрнэт-праекта «Герои страны».