Казяба Валянціна Іванаўна

Дата нараджэння: 08.01.1927 Паставічы, в., Старадарожскі раён, Мінская вобласць

Кароткая даведка: работнік сельскай гаспадаркі (звеннявая па вырошчванні кок-сагызу, кіраўнік брыгады па вырошчванні агародніны), Герой Сацыялістычнай Працы (1951), узнагароджана ордэнам Леніна (1951), медалямі

Дзявочае імя: Дарошка Валянціна Іванаўна

Імёны на іншых мовах: Дорошко Валентина Ивановна (руская); Казяба Валентина Ивановна (руская); Козяба Валентина Ивановна (руская); Козябо Валентина Ивановна (руская);

Валянціна Іванаўна Дарошка (у замужжы Казяба) нарадзілася ў шмадзетнай сялянскай сям’і вёскі Паставічы Старадарожскага раёна Мінскай вобласці. Да пачатку Вялікай Айчыннай вайны змагла атрымаць толькі пачатковую адукацыю ў мясцовай школе. З лета 1944 г. прымала ўдзел у аднаўленні мясцовага калгаса імя Сталіна і адначасова наведвала пяты клас школы.

З-за цяжкіх сямейных абставінаў Валянціна была вымушаная кінуць вучобу і пайсці працаваць. Два гады яна выконвала абавязкі рахункавода, у 1947 г. стала працаваць у паляводчай брыгадзе. У пасляваенныя гады асноўнай спецыялізацыяй гаспадаркі з’яўлялася вырошчванне кок-сагызу, які ў той час быў важнай сельскагаспадарчай культурай. У 1948 г. Валянціна Дарошка ўзначаліла спецыялізаванае звяно па вырошчванні кок-сагызу. Адсутнасць практычнага вопыту не дазволіла адразу атрымаць высокі ўраджай. Самаадданая праца, сістэматычная вучоба і высокая культура земляробства дазволілі каўчукаводам Валянціны Дарошка з цягам часу дабівацца высокіх ураджаяў. Найбольш паспяховым для звяна стаў 1950 г., калі на ўчастку плошчай два гектары было атрымана па 68,7 цэнтнера каранёў кок-сагызу з кожнага гектара.

Указам Прэзідыума Вярхоўнага Савета СССР ад 3 ліпеня 1951 г. за атрыманне высокіх ураджаяў каранёў кок-сагызу Валянціне Іванаўне Дарошка было прысвоена званне Героя Сацыялістычнай Працы з уручэннем ордэна Леніна і залатога медаля “Серп і молат”.

Калі ў краіне з’явіліся новыя, больш танныя крыніцы каўчуку, вырошчванне экзатычнай расліны было спынена. Доўгія гады Валянціна Іванаўна паспяхова працавала ў родным калгасе імя Сталіна (з 1961 г. – “Дружба”, цяпер – ААТ “Паставічы”) і нязменна паказвала ўзоры самаадданай працы. У 1972 г. узначаліла агародніцкую брыгаду і працавала ў калгасе да выхаду на заслужаны адпачынак. Прымала актыўны ўдзел у грамадскім жыцці калгаса, выбіралася дэпутатам Паставіцкага і Новадарожскага сельсаветаў. Узнагароджана ордэнам Леніна (1951), медалямі.

Імя Героя занесена ў Кнігу народнай славы Старадарожскага раёна Мінскай вобласці. З 2010 г. у гонар В.І. Казяба праводзяцца раённыя спаборніцтвы за дасягненне высокіх вынікаў у вытворчасці прадукцыі раслінаводства.

Пераклад 2021 г. матэрыялаў інтэрнэт-праекта “Герои страны”.