Па пісьмовых крыніцах Мышкавічы вядомы з ХVI ст. У 1506 г. гэта сяло ў Бабруйскім старостве ВКЛ, вялікакняжацкае ўладанне. Жыхары займаліся земляробствам, шавецкім і кравецкім промысламі. У 1647 г. налічвалася 13 дамоў, пякарня, карчма.

Пасля Другога падзелу Рэчы Паспалітай (1793) Мышкавічы ўвайшлі ў склад Расійскай імперыі. У 1863 г. была адкрыта царкоўнапрыходская школа. Паводле перапісу 1897 г. у вёсцы было 489 жыхароў. У 1907 г. Мышкавічы належалі Качэрыцкай воласці Бабруйскага павета Мінскай губерні.

У пачатку 1920-х гг. мясцовая двухкласная школа была пераўтворана ў чатырохкласную. У 1931 г. быў створаны калгас “Рассвет” (у 1935 г. аб’ядноўваў 130 сялянскіх гаспадарак). У Вялікую Айчынную вайну з канца чэрвеня 1941 і да канца чэрвеня 1944 г. вёска была акупіравана. У баях каля Мышкавіч загінулі 26 савецкіх воінаў і партызан, 132 жыхары загінулі ў час Вялікай Айчыннай вайны. У 1983 г. у іх гонар загінуўшых у цэнтры вёскі быў узведзены мемарыял Славы.

Адразу пасля вызвалення Мышкавіч калгас “Рассвет” узначаліў Герой Савецкага Саюза К.П. Арлоўскі. У 1958 г. за выдатныя поспехі ў аднаўленні гаспадаркі старшыня калгаса атрымаў ганаровае званне Героя Сацыялістычнай Працы. У маі 1967 г. за дасягненні ў развіцці сельскагаспадарчай вытворчасці калгасу “Рассвет” быў уручаны ордэн Леніна. У 1968–1997 гг. легендарнай гаспадаркай кіраваў двойчы Герой Сацыялістычнай Працы В.К. Старавойтаў.

Аграгарадок Мышкавічы створаны ў 2005 г. Ён з’яўляецца цэнтральнай сядзібай адкрытага акцыянернага таварыства “Рассвет імя К.П. Арлоўскага”. На тэрыторыі аграгарадка размешчаны 3 жывёлагадоўчыя комплексы, трактарная брыгада, цяплічны камбінат, сховішча для агародніны, зернесушыльны комплекс, рыбная гаспадарка, цэх дрэваапрацоўкі, пашывачны цэх, гасцініца, сталовая і інш. Працуюць сярэдняя школа, яслі-садок “Вясёлка”, філіял дзіцячай школы мастацтваў г. Кіраўска, Палац культуры, бібліятэка, гандлёвыя аб’екты, адзяленні Беларусбанка і паштовай сувязі, фельчарска-акушэрскі пункт, аптэка, сацыяльны пункт.

Матэрыял падрыхтаваны ў 2021 г. на аснове інфармацыі, змешчанай на сайце Кіраўскага райвыканкама.