Сноўскі палацава-паркавы комплекс

Дата пачатку: 1827 Сноў, маёнт., Навагрудскі павет, Мінская губерня (цяпер аг. Сноў, Нясвіжскі раён, Мінская вобласць)

Кароткая даведка: помнік палацава-паркавай архітэктуры ХІХ ст., унесены ў Дзяржаўны спіс гісторыка-культурных каштоўнасцей Рэспублікі Беларусь

Варыянты назвы: Палацава-паркавы ансамбль Рдултоўскіх; Палацава-паркавы ансамбль у Снове

Назвы на іншых мовах: Дворец Рдултовских (руская); Дворцово-парковый ансамбль Рдултовских (руская); Сновский дворцово-парковый комплекс (руская); Усадьба Гартингов (руская); Усадьба Рдултовских (руская);

Палац і парк Рдултоўскіх у аграгарадку Сноў Нясвіжскага раёна лічыцца адным з найпрыгажэйшых помнікаў архітэктуры і палацава-паркавага мастацтва першай паловы XIX ст. Пабудаваны ён па праекце архітэктара Браніслава Тычэцкага для навагрудскага павятовага маршалка Казіміра Рдултоўскага. У архітэктуры палаца дакладна вытрыманы прапорцыі, таму, нягледзячы на вялізныя памеры (працягласць палаца 140 метраў) ён выглядае вельмі гарманічна. Элегантныя портыкі, строгія калоны бакавых крылаў, арачныя ваконныя праёмы і лаканічны дэкор сведчаць аб наяўнасці добрага густу ўладальніка. Унутраная планіроўка палаца неаднаразова мянялася, але вонкавы выглад застаўся амаль нязменным. Вакол палаца разбіты вялікі парк у рамантычным стылі. Яго ўпрыгожвала сістэма каналаў з маляўнічымі астравамі, масткамі, альтанкамі. Апошнім гаспадаром сядзібы быў барон Гарцінг, які потым прадаў яе польскаму Корпусу пагранічнай аховы. Пасля Вялікай Айчыннай вайны садзіба была ва ўласнасці савецкіх вайскоўцаў. У 2021 г. яна прададзена ў прыватнае карыстанне. Магчыма ў хуткім часе тут з’явіцца новы турыстычны аб’ект.

Матэрыял падрыхтаваны ў 2022 г.